"Шопоков ситиге" барып шору каткан кардарлар/ "Дөөлөт курулуш" качан кыймылдайт?

"Дөөлөт курулуш" компаниясынын "Шопоков эко сити" турак жайы былтыр күздөн бери арсар болуп турат. Буга нааразы болгон кардарлары кыш чилдеге карабай чогулуп арыз-муңун айтышты. Компанияга миңден ашуун адам үй алам деп акча төгүп жатат. Бирок 2026-жылдын аягында бүтөт делген 1-блогу котлавандан көтөрүлбөй турат. Директору Азамат Айтпаев үйдү бүтүрүүгө кытайлык инвесторлор менен макулдашылып, кайра ишке ашпай калганын айтты. Учурда "Дөөлөт курулуштун" 3-5 млн. долларлык активдерин сатып жатканын белгиледи. Ал эми Курулуш министрлиги компанияны текшерип жатат. Бир жуманын ичинде саясий чечим кабыл алынарын билдирди.