თბილისის ახალი ზოოპარკი მზად არის სტუმრების მისაღებად

თბილისის ზღვის მიმდებარე ტერიტორიაზე ახალი ზოოპარკი აგვისტოში პირველ ვიზიტორებს მიიღებს. პროექტი, რომლის განხორციელებაც 2015 წლის წყალდიდობის შემდეგ დაიწყო, ეტაპობრივად იხსნება და, მიუხედავად იმისა, რომ სამშენებლო სამუშაოები ჯერ კიდევ გაგრძელდება, დამთვალიერებლებს უკვე შეეძლებათ ახალი სივრცის მონახულება. თბილისის ზოოპარკის დირექტორის მოადგილის დავით თაქთაქიშვილის განმარტებით, ახალი ზოოპარკის ტერიტორია ძალიან ფართოა და მისი სრულად ათვისება ეტაპობრივად მიმდინარეობს. ცხოველების ნაწილი უკვე გადაყვანილია, თუმცა ვოლიერების ნაწილი ჯერ კიდევ შენდება. ზოოპარკის ადმინისტრაციაში მიაჩნიათ, რომ საზოგადოებას უკვე უნდა მიეცეს შესაძლებლობა, საკუთარი თვალით ნახოს, როგორ იქმნება ახალი თაობის ზოოპარკი და რამდენად უკეთეს პირობებში იცხოვრებენ ცხოველები ახალ გარემოში. გახსნა გრანდიოზული საზეიმო ღონისძიების გარეშე გაიმართება. შესვლის საფასური უცვლელი რჩება: 3 წლამდე ბავშვებისთვის შესვლა უფასოა, 3-დან 12 წლამდე — 2 ლარი, ხოლო 12 წლიდან — 4 ლარი. ამასთან, თბილისის არსებული ზოოპარკი ფუნქციონირებას არ წყვეტს. ცხოველების ნაწილი კვლავ ძველ ტერიტორიაზე დარჩება, ამიტომ ვიზიტორებს ორივე ზოოპარკის მონახულება შეეძლებათ. ძველი ზოოპარკი ყოველდღიურ რეჟიმში გააგრძელებს მუშაობას. ახალ ზოოპარკში, გახსნის ეტაპზე ვიზიტორებისთვის ხელმისაწვდომი იქნება კავკასიის ბიოგეოგრაფიული ზონა. მომავალში ახალი ზოოპარკი მსოფლიოს სხვადასხვა რეგიონის მიხედვით დაყოფილ სივრცეებს გააერთიანებს, თუმცა პირველ ეტაპზე აქცენტი სწორედ ადგილობრივ ბუნებასა და კავკასიის ფაუნაზე კეთდება. ზოოპარკისთვის მნიშვნელოვანი იყო საქართველოსა და კავკასიის უნიკალური ცხოველური სამყაროს სრულყოფილად წარმოჩენა. კავკასიის ზონაში დამთვალიერებლები იხილავენ კეთილშობილ ირემს, დომბას, დათვს, მგელსა და სხვა ადგილობრივ სახეობებს. ახალ ზოოპარკში უკვე გადავიდა თბილისის ზოოპარკის ერთ-ერთი ყველაზე ცნობილი ბინადარიც — ბოკვერი შანი, რომელიც პირველ სტუმრებს სწორედ ახალ სივრცეში შეხვდება. ამავდროულად, ზოოპარკის სხვა ნაწილების განვითარება გრძელდება. ამჟამად აქტიურად მიმდინარეობს აფრიკის ზონის მშენებლობა, ხოლო მომავალში ახალი ზოოპარკი ეტაპობრივად შეივსება სხვა ბიოგეოგრაფიული სივრცეებითაც. ახალი ზოოპარკი მხოლოდ ახალი მისამართი არ არის. ბოლო წლებში ზოოპარკის ფუნქციაც მნიშვნელოვნად შეიცვალა. დღეს მისი ერთ-ერთი მთავარი მიმართულება ბუნების კონსერვაცია, გადაშენების პირას მყოფი სახეობების დაცვა, გამრავლება და მათზე ზრუნვაა. სწორედ ამ მიზანს ემსახურება ახალი, თანამედროვე სივრცეც, რომელიც მომავალში არა მხოლოდ დასათვალიერებელი ადგილი, არამედ ველური ბუნების დაცვის მნიშვნელოვანი ცენტრი იქნება. ----------------------------------------------------------- Powdered Waltz - The Mini Vandals ----------------------------------------------------------- ჯემნიუსი გიყვებათ ახალ ამბებს და ისტორიებს კავკასიიდან. ეს არის მედია-პლატფორმა, რომელიც აერთიანებს კავკასიის სხვადასხვა რეგიონში მცხოვრებ პროფესიონალ ჟურნალისტებს, მოქალაქე-რეპორტიორებს და ექსპერტებს. ვებგვერდი - www.jam-news.net/ge Facebook -   / jamnewsge   Telegram- /https://t.me/bukis_baza