HIĂP ADAI HRƠI KHUA TAL XV AMĂNG THǓN ĐĂO (Mt 13, 1-23)

===Hạt Giống Lời Chúa ===Pơjeh Hiăp Adai HIĂP ADAI HRƠI KHUA TAL XV AMĂNG THǓN ĐĂO (Mt 13, 1-23) TƠLƠI MƠAK KLĂ YÊSU KRISTÔ KHUA TUI MATHÊÔ PÔ MƠYANG. Amăng hrơi anun Yêsu tơbiă mơng sang, nao ding dô̌ ƀơi hang ia rơsǐ. Khul ană plơi pla lu lin pơtum pơƀut jě Ñu, tơl Ñu amăng sa bôh song hăng dô̌ ber; abih khul ană plơi pla dô̌ ƀơi hang ia. Lu tơlơi Ñu ruai kơ gơñu amăng tơlơi pơhmutu. Yêsu lăi: "Anai pô sai tơbiă nao sai. Kơplah ñu sai, hmâo pơjeh lě djơ̌ ƀơi gah jơlan, čim brim rai čoh ƀong abih. Hmâo pơjeh lě djơ̌ ƀơi lǒn rơga, lǒn ƀu hmâo lu đơi ôh; pơjeh čat mơtam, yua kơ lǒn ƀu dơlam ôh; yang hrơi tơbiă, pơiă hang, yua kơ ƀu hmâo akha, gơ̌ krô mơtam. Hmâo pơjeh pơkon lě djơ̌ amăng rok drơi, rok jing dlông, gôm hǐ gơ̌. Hmâo pơjeh pơkon lě djơ̌ amăng lǒn hiam, gơ̌ mơbôh, sa jing ha rơtuh, sa jing năm pluh, sa jing tlâo pluh. Hlơi hmâo tơngia pioh hmư̌, hmư̌ bě". Ƀing pô juat tui rai lăi kơ Yêsu: "Yua hơgơt Ih pơhiăp hăng gơñu amăng tơlơi pơhơmutu?" Yêsu lăi glăi hăng gơñu: "Yua kơ brơi laih kơ ƀing gih thâo dum bruă hơgom mơyang Dêh Čar Pơtao Adai; samơ̌ ƀu brơi kơ ƀing gơñu ôh. Kơyuadah pô hmâo, amra brơi kơ ñu hăng ñu amra hmâo lu hloh; samơ̌ pô ƀu hmâo, dum tơlơi ñu hmâo, amra mă đuăi mơn. Yua anun Kâo pơhiăp hăng gơñu amăng tơlơi pơhơmutu: yua kơ gơñu lăng ƀu thâo ƀuh, gơñu hmư̌ samơ̌ ƀu thâo hmư̌, ƀu thâo hluh lơi. Tui anun giong laih tơlơi Isaia pô ba hiăp adai lăi: Gih prong hmư̌, hăng ƀu hluh ôh, gih prong lăng, hăng ƀu ƀuh lơi. Yua kơ hơtai bôh khul ană čar anai khăng laih, gơñu kơpil tơngia mơta pit, huǐdah blang mơta, tơngia hmư̌, pran jua hluh hăng wot glăi, huǐdah Kâo pơsuaih gơñu. Bơ gih, mơyun mơak kơ mơta ƀing gih yua kơ ƀuh, tơngia ƀing gih yua kơ hmư̌. Sit Kâo lăi biă kơ ƀing gih: lu ƀing pô ba hiăp adai, hăng ƀing pô tơpă uaih kơ ƀuh dum tơlơi ƀing gih ƀuh, samơ̌ ƀu ƀuh ôh, hmư̌ dum tơlơi ƀing gih hmư̌, samơ̌ ƀu hmư̌ ôh. Hơnǔn ƀing gih hmư̌ bě tơlơi pơhmutu pô sai pơjeh. Hlơi pô hmư̌ Hiăp Dêh Čar Pơtao Adai, samơ̌ ƀu hluh, pô sat rai mă hǐ dum tơlơi sai laih amăng pran jua pô anun, anun pô čơkă pơjeh sai ƀơi gah jơlan. Pô čơkă pơjeh sai ƀơi lǒn rơga: pô hmư̌ Hiăp mơak hlak čơkă mơtam; samơ̌ ñu ƀu hmâo akha ôh amăng ñu pô, kơnong jang jai đuč; truh hmâo tơlơi pơtơnap ƀôdah kơpǐ kơpet yua kơ Hiăp, ñu tơhơnač rơbuh mơtam. Pô čơkă pơjeh amăng rok drơi tui anun mơn: ñu hmư̌ Hiăp, samơ̌ ñu bơngot kơ bruă lǒn tơnah, tơlơi pơdrong sah plư, hơnǔn juă Hiăp, Hiăp ƀu mơbôh ôh. Pô čơkă mă pơjeh amăng lǒn hiam: ñu hmư̌ Hiăp, hăng hluh, mơbôh, hăng ba rai "đa ha rơtuh, đa năm pluh, đa tlâo pluh". Anun Hiăp Khua Adai Biă!