«Sustraitik espaziora» - ERRIGORA Dokumentala

Errigorak «Sustraitik espaziora» dokumentala estreinatu berri du. 54 minutuko ikus-entzunezko lan honek Errigora herri-ekimenaren 13 urteko ibilbidea jasotzen du, proiektuaren jatorria, barne-jarduna eta egindako bideari buruzko hausnarketak bilduz. Dokumentalak Errigoraren lana barrutik ezagutzeko aukera ematen du: Nafarroa erdi eta hegoaldeko euskalgintzaren beharrei erantzuteko sortutako ekimenaren bilakaera, auzolana, euskararen aldeko ekintzak eta elikadura burujabetzaren inguruan eraikitako sarea. Horretarako, proiektuan parte hartzen duten hainbat eragileren testigantzak jasotzen ditu, tartean D ereduko ikastoletako gurasoenak eta euskaltegietako ordezkarienak. Ikastolekin duen lotura eta euskararen aldeko elkarlanaren garrantzia kontuan hartuta, dokumentala ikastoletako hezkuntza-komunitateetan zabaltzea interesgarria iruditzen zaigu. Familiei, langileei eta komunitateko gainerako kideei Errigoraren lana ezagutzeko eta euskararen aldeko herri-ekimen honen inguruan hausnartzeko aukera ematen die.