Pagipani cholon bewalko dedrang manrika!

Bible text: Abachenga 9:18-27. Isolni Gisk on·aniko man·e ua jat ge·gittamni ma·kringni itihas maikai ong·gnigipachim uko Noa u·isoahachim. Hamni deritchurangko sandie pagipani pal dedrangni gimin ua indine aganaha, “Kanaanko sao on·aha, ua uni adatangrangni nokkolni nokkol ong·gen.” Hamni ong·ronggija dosko dakanian an·tangni pagipako mande ra·gijania uni janggioni dongjaha ine mesokaha, aro uan uni cholonni mitchigniko mesokani ong·ahachim. Ia namgijagipa cholon Kanaano aro uni dedrangrangni gisepo dongkamaiaha, aro uamangni dosan Isolni bichalko an·tangtangni gisepona sokbaataha. Indiba Shem aro Japhethni pagipana aro Isolni niamrangna mandera·aniko mesokania, uamangni dedrang su·drangna mikkangchi uamangni silroroaniko ku·rachakaniko man·ataha. Uamangni dedrangni dedrangna indine aganaha: “Shemni Isol Jihova namchong; aro Kanaan uni nokkol ong·china. Isol Japhetko gipatgen aro ua Shemni tamburango donggen.” Shemni dedrangan ku·rachakgimin Isolni ku·rachakgipa Jokatgipani atchignina seokgimin ma·kring ong·genchim. Jihovaan Shemni Isol ong·genchim. Uonin Abraham atchigenchim, aro Kristoni atchignigipa Israelni manderang ong·bagenchim. “An·senga ua manderang jerangni Isol Jihova ong·a.” (Git 144:15). Aro Japhetara “Shemni tamburango donggen.” Nama kattani patianiko man·anio dingtangmancha Japhethni dedrangranga bakko man·pagenchim. Kanaanni deritchuranga namjabatgipa songsarekni dolona tang·onangaha. Katchinike saoko donsoahaoba bang·a ritcha bilsirangna ua saoko ra·rikkuahachim. Isolni chakchikna amenga dipetna uamang Ua uamangko chakchikaha. Uni ja·mano uamangko watgalaha, aro uamang Shem aro Japhethmangni deritchurangni nokkolrang ong·tokaha. Noani katchinike agansoania uamangko ka·onange ba mikkang nie aganani ong·jachim. Uni agananian uamangko sao nangataha ineba ong·jachim. Indiba uamangni janggi tanganio maiko seoke ra·a aro mai cholon uamango donggenchim uko mesoksoanisa ong·a. Uamangni cholono pangchake Isol maiko uamangna dakgenchim ukosa agansoani ong·achim. Ong·ronga gita, dedrangrang pagipani cholon aro dakbewalrangko man·rika, aro chasongni chasongna uamangni dedrangrang ua apsan cholko ja·rika. Hamni mande ra·gijaniko mesokania uni dedrangrangna chasongni man·rikani ong·aha. “Indiba papi saksa bang·a namako nisia” (Aganprakgipa 9:18). Indiba Shemni pagipana mande ra·aniko mesokania baditana patianiko man·atskaaha; aro uni ma·kringoni mairongpilgipa rongtalgipa manderang atchibaskaaha! “Chu·soke namgipani salrangko Jihova u·ia; Aro uni deritchu patiako man·a” (Git 37:18, 26). “Uni gimin iako u·ibo, nang·ni Isol Jihova, uan Isol ong·a, an·tangna ka·sagipa aro uni ge·etanirangko ra·giparang baksa ka·sachakaniko aro ku·monggrikani niamko chasong hajalsaona rakigipa” (Deuteronomy 7:9).