Nardaran sakini Berlində Prezidentin köməkçısı ilə naziri sual atəşinə tutdu

Nardaran sakini Ələmdar Bünyatov iyulun 20-də Berlində Prezident İlham Əliyevin köməkçisi Hikmət Hacıyev və xarici işlər naziri Ceyhun Bayramovu Almaniyanın Kanslerinin ofisindən çıxarkən haqlayıb. Nardaranda üzləşdiyi repressiyadan sonra Azərbaycanı tərk edən “Müsəlman Birliyi” Hərəkatının fəalı ilə dövlət rəsmiləri arasında polemika yaranıb. Ələmdar Bünyatov həm Hacıyevə, həm də Bayramova Azərbaycandakı siyasi həbslər, cəzaçəkmə və saxlanma müəssisələrində işgəncə halları, Prezident İlham Əliyevin keçmiş kürəkəninin “Sea Breeze” kurortuna görə sakinlərdən zəbt olunan torpaqlar, Nardaran sakinlərinə təzyiqlər haqqında çoxsaylı suallar verə bilib. Ələmdar Bünyatov həm də Azərbaycanlı Siyasi Mühacirlərin Koordinasiya Mərkəzinin üzvüdür. O, mühacirətdə yaşayan fəallarla birlikdə Almaniyanın Kanslerinin ofisinin qarşısında aclıq aksiyası keçirir. Aksiyanın tələbi Azərbaycanda siyasi motivlərlə həbs olunan qadın jurnalistlərin və inanclı qadınların azadlığa buraxılmasıdır.