BDU-dan uzaqlaşdırılan Araz Əliyev: "Ali məktəblərdə alternativ fikrin olmasını istəmirlər"

3-cü Respublika Platformasının qurucu heyət üzvü Araz Əliyevlə Bakı Dövlət Universiteti əmək müqaviləsi bağlamaqdan imtina edib. Universitet bunu yetərli dərs saatlarının olmaması ilə izah edib. Araz Əliyev isə hesab edir ki, onunla əmək müqaviləsi siyasi fəaliyyətinə görə bağlanılmayıb. O bunu ali təhsil ocaqlarında alternativ fikrin qadağan olunması ilə əlaqələndirir. Araz Əliyev gənc doktorantdır, 5 il ərzində Bakı Dövlət Universitetində saathesabı müəllim olaraq fəaliyyət göstərib. Eyni zamanda, Nida Vətəndaş Hərəkatının üzvü, 3-cü Respublika Platformasının qurucularındandır. O ötən ilin dekabrında 25 sutka inzibati qaydada həbs olunaraq xırda xuliqanlıqda ittiham olunmuşdu. Azadlığa buraxıldıqdan sonra mediaya açıqlamasında həbsinin səbəbini platformanın digər üzvü Akif Qurbanovun noutbukunun şifrəsini polisə verməməsi ilə əlaqələndirirdi. Araz Əliyevin də üzvü olduğu 3-cü Respublika Platforması ötən ilin dekabrın 7-də yaradılıb. Cəmi 3 ay sonra martın 6-da platformanın spikeri, Demokratik Təşəbbüslər İnstitutunun təsisçisi Akif Qurbanov saxlanılıb. 2 gün sonra onunla birgə platformanın digər üzvü Ruslan İzzətli barəsində də Xətai Rayon Məhkəməsinin qərarı ilə qaçaqmalçılıq ittihamı ilə 4 aylıq həbs qətimkan tədbiri seçilib.