{عرفوه بالعلم}(18) كيف بدأت الحياة؟

سنة 1953 .. طالب دراسات عليا في جامعة شيكاغو.. اسمه ستانلي ميلر STANLEY Miller .. جاب برطمانين.. واحد فيه شوية مية.. و التاني فيه خليط من غاز الميثان و الأمونيا و كبريتيد الهيدروجين.. عشان يمثل الغلاف الجوي المفترض وجوده في بداية تكوين الكرة الأرضية.. ووصل البطرمانين بخراطيم .. و بدأ يطلق شرارات كهربية.. زي الصواعق كده.. و سابهم.. بعد كام يوم اتحولت المية اللي في البرطمان للون مابين الاخضرو الاصفر.. و لما حللها.. لقاها مليانة أحماض أمينية و أحماض دهنية و سكريات و مركبات عضوية تانية.. فالراجل هرش في دماغه و قالك يبقى أكيد الحياة بدأت بالشكل ده! و الصحافة و الإعلام زاط.. و اتكلموا عن الاكتشاف الجبار ده.. و صوروا الوضوع و كأنما ظهور الحياة بالبساطة دي.. و كل المطلوب ان الراجل كان يمسك البرطمان اللي لقى فيه المكونات العضوية ده و يرجه كويس بس شوية.. و يسيبه و هايلاقيه تاني يوم مليان كائنات حية.. و لكن بمرور الوقت.. و بعد ما انتهت الزيطة.. اكتشفوا ان موضوع الحياة مش بالبساطة دي أبدا..و ان القضية مش قضية ان يكون عندك مكونات الطبخة و بوتاجاز.. لأ ده المهم النفس.. التجربة اللي حكينا علهيا دي فات عليها النهاردة يمكن ٧٠ سنة مثلا.. و مافيش أي جديد.. ماحدش قدر أبدا يحول الشوربة اللي عملها ميلر دي لحياة عضوية.. العلماء حاولوا يغيروا مكونات التجربة.. زي تغيير مكونات الغلاف الجوي.. ولا جديد برضه.. عملت أحماض أمينية؟.. طب قشطة ايه المشكلة يعني؟... عمر المشكلة ماكانت في الأحماض الأمينية.. امال المشكلة فين؟..المشكلة هي البروتينات سعادتك.. البروتينات هي نتاج ارتباط الأحماض الأمينية ببعضها.. و احنا محتاجين بروتينات كتير.. كتير جدا.. ما حدش يعرف على وجه التحديد.. و لكن في جسم الإنسان فيه يمكن مليون نوع بروتين مختلف.. و كل بروتين من المليون ولا اكتر دول.. معجزة في حد ذاته! رياضيا.. من خلال كل قوانين الاحتمال.. البروتينات مش المفروض يكون لها وجود أصلا! عشان بروتين ما يتكون.. فاحنا محتاجين نرص الأحماض الأمينية بترتيب معين.. بالظبط زي ما بنرص الحروف بترتيب معين عشان نكون كلمة مفهومة.. طب ايه المشكلة؟.. مانرتبهم.. هي معضلة يعني؟.. ايوة معضلة سيادتك.. ماهو المشكلة ان لو اعتبرنا ان البروتين ده كلمة مكونة من حروف. و الحروف دي هي الأحماض الأمينية.. فالمشكلة سيادتك ان الكلمة الواحدة بتكون طويييييلة جدا.. ازاي؟.. تعالى نشوف مثال.. الكولاجين مثلا.. نوع شائع من البروتينات.. كلمة كولاجين.. بالعربي محتاجة ٧ حروف.. لازم يبقوا في الترتيب ده عشان تطلع الكلمة دي.. والا هاتكون كلمة تانية خالص.. و لكن البروتين نفسه.. بروتين الكولاجين.. عشان يتكون.. محتاج ١٠٥٥ حمض أميني.. مترتبين ورا بعض بتسلسل محدد.. مش ١٠٥٤.. ولا ١٠٥٦.. ولازم تسلسل محدد.. والا مايبقاش كولاجين.. يبقى حاجة تانية خالص... و الأهم من كده.. انك يستحيل تقدر تصنعه.. حتى لو عندك كل الأحماض الأمينية اللازمة.. ده بيتكون لوحده.. الأحماض الأمينية دي بتتجمع في الترتيب المحدد ده.. و تكون الكولاجين.. و دي المعجزة.. هو ده "الخلق".. اللي انت كمخلوق عاجز عنه.. عشان كده زي ماقلنا.. رياضيا.. احتمالية ترتيب ١٠٥٥ جزئ حمض أميني بتسلسل محدد بالشكل ده لوحدهم.. هي ببساطة.. صفر.. مستحيل.. عمره مايحصل لوحده أبدا.. عشان تتخيل الفكرة.. عارف ماكنة لعب القمار.. اللي هي بتشد الدراع ف ٣ صور يفضلوا يتحركوا بشكل عشوائي و تكسب لو طلعوا ال٣ صور في النهاية نفس الصور؟.. تخيل الماكنة دي.. بس بدل ٣ صور.. فيه خانات لـ١٠٥٥ صورة.. تفتكر كم مرة محتاج تشد الدراع بتاع اللعبة عشان الـ١٠٥٥ خانة يطلعوا بترتيب صور محدد؟.. عمرهم ماهايطلعوا أبدا .. حتى لو قللت عدد الخانات لـ٢٠٠ بس.. فرياضيا.. احتمال ان ال٢٠٠ خانة يطلعوا بترتيب محدد بشكل عشوائي هو واحد في الـ١٠ أس ٢٦٠.. يعني ١ و قدامه ٢٦٠ صفر.. الرقم ده أضخم من اننا نستوعبه أصلا.. بل أكبر من عدد الذرات اللي في الكون كله أساسا.. البروتينات ببساطة.. عبارة عن كيانات معقدة جدا.. الهيموجلوبين مثلا.. بيتكون من ١٤٦ حمض أميني بس.. و بالرغم من كده الموضوع احتاج ٢٣ سنة عشان يكتشفوا الترتيب الصحيح للأحماض الأمينية اللي بتكونه.. فاحنا عشان نقول ان أبسط بروتين اتكون بشكل عشوائي و بالصدفة.. فده هبل.. ده عامل بالظبط زي ماتقول ان إعصار ضرب مخزن خردة.. فالخردة اتجمعت مع بعضها و كونت طيارة جامبو .. للدعم على Patreon :   / ahmedbehiry   اشترك في القناة الرسمية على تليجرام: https://t.me/ABehiry الصفحة الرسمية لاحمد بحيري علي الفيسبوك   / أحمد-بحيري-ahmed-behiry-109415711865636   الصفحة الرسمية علي تويتر   / ahmedbehiry   اشترك في القناة لمتابعة الحلقات الجديدة http://goo.gl/2KheJZ المصادر: أعلم أهل الأرض داباليو داباليو داباليو دوط قووقل دوط قوم http://www.قooقle.com