សិលាចារឹកដ៏កម្រ ក៏មិនអាចគេចផុតពីការរងគ្រោះដោយការបាញ់ផ្លោង និងការទម្លាក់គ្រាប់បែកពីយោធាថៃ

​សិលាចារឹកដ៏កម្រចារជាភាសាខ្មែរបុរាណផង និងសំស្ក្រឹតផងស្ថិតនៅលើមេទ្វារនៃគោបុរៈទី២ ប្រាសាទព្រះវិហារ ក៏មិនអាចគេចផុតពីការរងគ្រោះដោយការបាញ់ផ្លោង និងការទម្លាក់គ្រាប់បែកពីយោធាថៃ ក្នុងសង្រ្គាមឈ្លានពានដណ្តើមកាន់កាប់ទឹកដីនៅបរិវេណប្រាសាទព្រះវិហាររបស់ប្រទេសកម្ពុជា។ លោក ផេង សំអឿន អគ្គនាយករងអាជ្ញាធរជាតិព្រះវិហារបានឲ្យដឹងថា សិលាចារិកដ៏កម្រនេះ ចារជាភាសាខ្មែរបុរាណផង និងសំស្ក្រឹតផង នៅក្នុងរជ្ជកាលព្រះបាទសូរ្យវរ្ម័នទី២ (សតវត្សរ៍ទី១២)។ ​ខ្លឹមសារសំខាន់នៃសិលាចារឹក បានកត់ត្រាអំពីព្រះរាជគ្រូរបស់ព្រះបាទសូរ្យវរ្ម័នទី២ ដែលបានធ្វើធម្មយាត្រាពីរាជធានីអង្គរ យកដង្វាយផ្សេងៗមកថ្វាយដល់លិង្គព្រះឥសូរ ឬទេពដែលរក្សាភ្នំព្រះវិហារ ព្រះនាម «ស្រីសិខៈរេស្វរៈ»។ ​ស្ថានភាពរងគ្រោះ និងការខូចខាត លោកបញ្ជាក់ថា ​នៅពេលមានការប៉ះទង្គិចគ្នាតាមព្រំដែន គោបុរៈទី២ បានរងការប៉ះទង្គិច និងត្រូវគ្រាប់កាំភ្លើងជាច្រើនកន្លែង។ ​សិលាចារឹកក៏រងត្រូវគ្រាប់ផ្ទាល់ បណ្តាលឱ្យបែកបាក់អស់មួយជ្រុងធំ ខណៈ​ផ្ទាំងថ្មចាប់ផ្តើមប្រេះស្រាំ និងរបកជាស្រទាប់ៗ ដែលងាយនឹងខូចខាតធ្ងន់ធ្ងរថែមទៀត ប្រសិនបើទឹកភ្លៀងជ្រាប ចូល។ ​យោងតាមរបាយការណ៍បេសកកម្មអង្កេតរបស់អង្គការ UNESCO និង ICOMOS ក៏ដូចជាអង្គភាពស៊ីម៉ាក់ (CMAC) គ្រាប់ផ្លោងធុនធ្ងន់ជាច្រើនប្រភេទ ដូចជា ១០៥ម.ម, ១២០ម.ម, ១៥៥ម.ម និងគ្រាប់បែកចង្កោម ត្រូវបានបាញ់សំដៅមកលើបរិវេណប្រាសាទព្រះវិហារ ក្នុងសង្រ្គាមឈ្លាន ពានរបស់យោធាថៃនៅក្នុងទឹកដីប្រទេសកម្ពុជា៕ Follow Kampuchea Thmey TV for more: Facebook:   / kptdaily   Telegram: https://t.me/kampucheathmeytv Tiktok:   / kampuchea_thmey_daily