AEMMC Dietsche Aundacht - Een Woaret Veheltniss met Jesus ... - 1 Johannes 1 - Ocktooba 18, 2026

Een Woaret Veheltniss met Jesus meent Jemeenschoft unjarenaunda (1 Johannes1) Jesus haft jesajcht daut hee woat siene Jemeent buen. Hee but dee met Menschen, un Menschen haben foaken Onneenichkjeiten, un dit brinjt Probleemen. Eenjemol denkj wie veleicht daut de Jemeent en de Tiet vom Nieen Tastament nich soone Probleemen haud aus wie vondoag haben. Dee hauden Probleemen, oba dee wieren von buten, von de Juden, von de Reema, ooda sestwua, oba nich von bennen en de Jemeent. Wan wie oba deepa doa nenn kjikjen see wie daut dee krakjt soone Probleemen hauden aus wie, wua de Leida sikj nich eenich wieren, wua de Jlieda en de Jemeent jäajen de Leida schauften, un noch mea. Vondoag well wie eene Rieej Bootschoften aunfangen en 1 Johanes. Dit wia een Breef woonen de Apostel Johanes schreef no eene Jemeent woone hee jejrint haud. Nu wieren doa faulsche Lieren oppjekomen, de Jemeent haud sikj jespoolt, doa wieren Onneenichkjeiten mank de Menschen, un Johanes schreef toom de Jemeent halpen vestonen waut de Woarheit wia. Een grootet Probleem wia daut Menschen sikj nich eenich wieren äwa wäa Jesus Christus krakjt wia, un woo dän Gloowen aun am uttoläwen. Johanes woat ons dan sajen daut Eenichkjeit sea wichtich es, besondasch Eenichkjeit en ons Gloowen. Doa es mau dan woare Jemeenschoft wan wie stemmen en wäa Jesus es, waut siene Lia es, un woo wie dee utläwen. Dan woat Johanes ons sajen woo wie weeten kjennen waut de Woarheit werkjlich es. Well wie toop studieren von ons Gloowen, un woo wie dän vondoag utläwen kjennen. Prädja Abe Harder