ASMA MWINYI AMPOKEA KIJANA JUMA, AKITOKEA MLOGANZILA KWA MATIBABU

Ni miezi kadhaa imepita tangu Asam Online TV iripoti kilio cha kijana Juma Salum Mwadini, mkazi wa Mwera Pongwe, aliyekuwa amepooza mwili na kuhitaji msaada wa matibabu. Kilio hicho kilimfikia Mbunge wa Jimbo la Welezo, Mhe. Asma Ali Hassan Mwinyi, ambaye aliamua kulivalia njuga suala hilo na kusimamia matibabu ya Juma, kuanzia Hospitali ya Mwera Pongwe, Lumumba hadi Hospitali ya Mloganzila jijini Dar es Salaam. Leo, Juma amerejea Zanzibar baada ya matibabu hayo. Bandari ya Malindi haikuwa tu sehemu ya kumpokea, bali pia imekuwa mwanzo wa sura mpya ya maisha yake, huku furaha na tabasamu vikionekana usoni mwake na kwa familia yake. Akizungumza baada ya kuwasili, Mhe. Asma amesema hali ya Juma imeimarika na sasa anaweza kufanya baadhi ya shughuli mwenyewe, tofauti na awali alipokuwa akihitaji msaada muda wote. Kwa upande wake, Juma Salum Mwadini ameeleza furaha yake ya kurejea nyumbani na kumshukuru Mhe. Asma kwa msaada aliompa, akisema matibabu hayo yamemsaidia kurejesha tabasamu lake lililopotea kwa muda mrefu. Wakati mwingine, msaada hauishii kwenye fedha au matibabu pekee; huanza pale mtu anaposikia kilio cha mwingine na kuamua kutokipuuza. #AsamOnlineTV #ZanzibarNews #HabariZanzibar #JumaSalumMwadini #Welezo #MweraPongwe #Mloganzila #AsmaAliHassanMwinyi #Humanity #NewsUpdate #Trending