Swaminarayan Chosathpadi Sant Lakshan by Nishkulanand Swami

પદ - ૧ એક વાત અનુપ અમોલ, કરું છું કહેવાતણું; પણ મનભાઈ કહે છે મ બોલ, ઘોળ્યું ન કહેવું ઘણું... ૧ પણ વણકહ્યે જો વિગત, પડે કેમ પરને; સંત અસંતમાં એક મત, નિશ્ચે રહે નરને... ૨ માટે કહ્યા વિના ન કળાય, સહુ તે સુણી લહીએ; મોટા સંતનો કહ્યો મહિમાય, તે સંત કોને કહીએ... ૩ કે’ છે સંત સેવ્યે સરે કાજ, એમ છે આગમમાં; સુણી નિષ્કુળાનંદ તે આજ, સહુ છે ઉદ્યમમાં... ૪ પદ - ૨ એવા સંત તણી ઓળખાણ, કહું સહુ સાંભળો; પછી સોંપી તેને મન પ્રાણ, એ વાળે તેમ વળો... ૧ જેના અંતરમાં અવિનાશ, વાસ કરી વસિયા; તેણે કામ ક્રોધ પામ્યા નાશ, લોભ ને મોહ ગયા... ૨ એવા શત્રુતણું ટળ્યું સાલ, લાલ જ્યાં આવી રહ્યા; તેણે સંત થયા છે નિહાલ, પૂરણકામ થયા... ૩ એવા સંત જે હોય સંસાર, શોધીને સેવી લીજીએ; કહે નિષ્કુળાનંદ નિરધાર, તે લાભ તો લીજીએ... ૪ પદ - ૩ સાચા સંત સેવ્યે સેવ્યા નાથ, સેવ્યા સુર સહુને; સેવ્યો મુક્ત મુનિ ઋષિ સાથ, બીજા સેવ્યા બહુને... ૧ એવા સંત જમ્યે જમ્યા શ્યામ, જમ્યા સહુ દેવતા; જમ્યા સર્વે લોક સરવે ધામ, સહુ થયા ત્રપતા... ૨ એવા સંતને પૂજીને પટ, પ્રીત્યેશું પહેરાવિયાં; તેણે ઢાંક્યાં છે સહુના ઘટ, ભલાં મન ભાવિયાં... ૩ એવા સંત મળ્યે મળ્યા સ્વામી, ખામી કોયે ન રહી; કહે નિષ્કુળાનંદ શીશ નામી, સાચી સહુને કહી... ૪ પદ - ૪ નક્કી વાત છે એ નિરધાર, જૂઠી જરાયે નથી; સહુ અંતરે કરો વિચાર, ઘણું શું કહું કથી... ૧ એક જમતાં બોલિયો શંખ, અસંખ્યથી શું સર્યું; એક જમીને બોલ્યો નિઃશંક, યમુના જાવા કર્યું... ૨ એમ એક પૂજ્યે પૂજ્યા સહુ, સેવ્યે સહુ સેવિયા; માટે ઘણું ઘણું શું કહું, ભેદ ભક્તના કહ્યા... ૩ હવે એવા વિના જે અનેક, જગતમાં જે કહીએ; કહે નિષ્કુળાનંદ વિવેક, સેવ્યે સુખ શું લહીએ... ૪ (અસંતનાં લક્ષણ) પદ - ૫ જેના અંતરમાં કામ ક્રોધ, લોભની લાહ્ય બળે; એવા બહુ કરતા હોય બોધ, તે સાંભળ્યે શું વળે... ૧ માન મમતા મત્સર મોહ, ઈરષા અતિ ઘણી; એવો અધર્મ સર્ગ સમોહ, ધારી રહ્યા જે ધણી... ૨ તેને સેવતાં શું ફળ થાય, પૂજીને શું પામીએ; જે જમાડીએ તે પણ જાય, ખાધું જે હરામીએ... ૩ એનાં દર્શન તે દુઃખદેણ, ન થાય તો ન કીજીએ; સુણી નિષ્કુળાનંદનાં વેણ, સહુ માની લીજીએ... ૪ પદ - ૬ એવા વિકારી જનની વાત, દેનારી છે દુઃખની; જેના અંતરમાં દી’ ને રાત, ઇચ્છા વિષય સુખની... ૧ એને અરથે કરે ઉપાય, શોધી સારા ગામને; પોતે પોતાનું મા’તમ ગાય, ચા’યે દામ વામને... ૨ કરે કથા કીરતન કાવ્ય, અરથ એ સારવા; ભલો દેખાડે ભક્તિભાવ, પર ઘર મારવા... ૩ એથી કેદી ન થાય કલ્યાણ, જિજ્ઞાસુને જાણવું; કહે નિષ્કુળાનંદ નિરવાણ, પેખી પરમાણવું... ૪ પદ - ૭ દેહ પોષવા સારુ જે દંભ, કરે છે જે કુબુદ્ધિ; ખોટા સુખ અરથે આરંભ, મૂકે નહિ મૂઆ સુધી... ૧ તેણે જનમ પશુને પાડ, ખોયો ખોટા કારણે; મોક્ષ મારગે દીધાં કમાડ, કડી જડી બારણે... ૨ ફેરો ન ફાવ્યો થયો ફજીત, જીત ગઈ જળમાં; મેલી મુક્ત મોટપ્યની રીત, ખ્યાતિ કરી ખળમાં... ૩ આપ ડહાપણે આખો દિવસ, દુઃખે ભર્યો દો’યલો; કહે નિષ્કુળાનંદ અવસ, ખાટ્યો માલ ખોયલો... ૪ પદ - ૮ સંત અસંતની ઓળખાણ, પાડી છે પુરાણમાં; સુણી સરવે જન સુજાણ, તણાશો મા તાણમાં... ૧ જડભરત જનક જયદેવ, એવું થાવું આપણે; ત્યારે કરતાં અસંતની સેવ, વાત કહો કેમ બણે... ૨ અતિ આદર્યું કામ અતોલ, પરલોક પામવા; ત્યારે ખરી કરી જોઈએ ખોળ, વિઘનને વામવા... ૩ વણ સમજે સાર અસાર, પાર કહો કોણ થયા; કરી નિષ્કુળાનંદ વિચાર, સંત અસંત કહ્યા... ૪