អតីតបវរកញ្ញា​ថៃ​ត្រូវចាប់ខ្លួនពីបទឆបោក​

អ្នកស្រី​ប៉ាណាដា «ប៊ូម» វង្សភូឌី តារាសម្តែង សកម្មជនសង្គម និងជាប្រធានមូលនិធិ Goodness Foundation ត្រូវបានចាប់ខ្លួននៅថ្ងៃសុក្រ ទី៦ វិច្ឆិកា នៅខាងក្រៅលំនៅដ្ឋានរបស់នាង ក្នុងខណ្ឌបឹងកុំ ទីក្រុងបាងកក។ ស្វាមីរបស់នាង អាទីប «ហ្គោត» អាណាន់តាវ៉ាន់ អ្នកវិនិយោគអចលនទ្រព្យ និងជាអ្នកជំនាញផ្នែកហាត់ប្រាណ បានចូលខ្លួនសារភាព​ដោយខ្លួនឯងដាច់ដោយឡែក។ អ្នកស្រី​ប៊ូម ត្រូវបានចោទប្រកាន់​ពីបទរួមគ្នាឆបោកសាធារណជន រួមគ្នាជាមួយមនុស្ស ២ នាក់ ឬច្រើននាក់ ដើម្បីលាងលុយកខ្វក់ និង​រួមគ្នាបញ្ចូលព័ត៌មានមិនពិតទៅក្នុងប្រព័ន្ធកុំព្យូទ័រ ដោយវិធីមិនស្មោះត្រង់ ឬបោកប្រាស់។ ស្វាមីរបស់គាត់​ ប្រឈមមុខនឹងបទចោទចំនួន ១៖ រួមគ្នាជាមួយមនុស្ស ២ នាក់ ឬច្រើននាក់ ដើម្បីលាងលុយកខ្វក់។ ករណីនេះផ្តោតលើការចោទប្រកាន់ពីការប្រើប្រាស់ខុសនូវប្រាក់បរិច្ចាគដល់មូលនិធិ Goodness Foundation របស់នាង។