អាមេរិក​ដាក់ទណ្ឌកម្ម​ថ្មី​លើក្រុមហ៊ុន​Prince Holding Group

កាលពីថ្ងៃព្រហស្បតិ៍ ៥ វិច្ឆិកា សហរដ្ឋអាមេរិកបានប្រកាសដាក់ទណ្ឌកម្មជុំថ្មីមួយប្រឆាំងនឹងក្រុមហ៊ុន Prince Holding Group របស់កម្ពុជា ដោយចោទប្រកាន់ថា ក្រុមហ៊ុននេះបានដំណើរការបណ្តាញមជ្ឈមណ្ឌលឆបោកតាមអនឡាញដែលមានវិសាលភាពគ្របដណ្តប់ទូទាំងតំបន់។ នៅក្នុងសេចក្តីថ្លែងការណ៍មួយ ការិយាល័យត្រួតពិនិត្យទ្រព្យសម្បត្តិបរទេស (OFAC) នៃក្រសួងសេដ្ឋកិច្ចសហរដ្ឋអាមេរិក បានឱ្យដឹងថា ខ្លួនបានដាក់ទណ្ឌកម្មលើបុគ្គលចំនួន ៤ នាក់បន្ថែមទៀត និងអង្គភាពចំនួន ៤១ ផ្សេងទៀត ដែល «គាំទ្រដល់បណ្តាញអាជីវកម្មរបស់អង្គការឧក្រិដ្ឋកម្មឆ្លងដែន Prince Group (Prince Group TCO)»។