Seenaa Jireenyaa Ob.Sarbeessaa Faajjii

Seenaa Jireenyaa Sarbeessaa Faajjii Sarbeessaa Faajjii abbaa isaa Faajjii Yaadasaa fi haadha isaa Guddattuu Fedhasaa irraa bara 1929 dhalate. Gosti warra isaa abbaan Abeebe Ganjii yoo ta’u haadhaan immoo Abeebe Jarjariidha.  Bakki addaa itti dhalate bakka Doobbii Dillisaa jedhamu yoo ta’u maatiin gara Doobbii Daalattiitti waan bakka jireenyaa jijjiiraniif Doobbii Daalattiitti guddate. Akkuma ijoollee kamuu maatii isaaf ajajamaa dirqama maatiin kennuuf raawwachaa guddate. Barumsa qeesiis baratee jira. Yeroo sanatti barumsi qindaa’aan jiraachuu baatus barumsa isaan nama cimaa faarfamu ture. Sarbeessaa Faajjii nama cimaa biyyi itti abdatuu fi gootummaan qixxee hin qabne ture.  Sababuma cimina isaa kana irraa ka’uun uummanni Ganda Doobbii bulchaa ganda isaanii akka ta’u sirna Dargii keessa bara 1970 filatee imaanaa itti kenne. Obboo Sarbeessaan bara ganda kana bulche keessatti qajeelummaan, garalaafummaa fi ittigaafatamummaan nama hunda ija tokkoon ilaaluun waan bulcheef waggoota kudha lamaaf ganda Doobbii Daalattii bulchuu danda’eera. Boodarra bara 1982 aangoo bulchaa gandaa irraa yoo ka’u immoo akka jaarsa biyyaatti biyya isaa tajaajiluu itti fufe. Ob.Sarbeessaan yoo uffatee bahu akkuma irraa bareedu yoo dubbatus irraa bareeda. Nama dubbii beekuu fi dhugaan jiraatu ture. Jaarsummaa taa’uun kan fuudhu fuusisee, kan wallole araarsee, kan wal ajjeeses dubbatee gumaa kaffalchiisuun nama dhugaa namni dubbii isaa akka ilaaluuf barbaaduu fi hanga lubbuun isaa jirtutti dhibdee adda addaa gandichatti uumamu furuun biyya tajaajilaa ture. Sarbeessaan gootummaanis yoo ta'e ilma duuba hin deebine ture. Waan gootummaa isaa hanga dubbatamuu olidha. Sababa gootummaa isaa kanaanis namni halaalumatti sodaatee dhiisa malee Sarbeessaatti bu’uun hin yaadamu. Hanga lubbuun jirutti eenyuufuu osoo harka hin kenniin duuti gaafa Sanbata waarii harka isa kennisiiste. Sarbeessaan abbaa firaati. Garalaafessaa fi arjaadha. Namni nyaatee waan quufu illee itti hin fakkaatu. Rakkataa rakkoo baasuun dheebotaa dheebuu baasuun nama beekamu ture. Loon horee hiyyeessaaf horii dabarsaa kennaa ture. Bara isaatti yeroo yeroo qabu akka mootiitti jiraachaa ture. Obboo Sarbeessaa Faajjii ijoollee hedduu mana isaatti gargaaree guddiseera. Ammas ijoollee afur guddisaa jira. Akkasumas Obboo Sarbeessaa Faajjii mucaa isaa hangafaa Sukkaaree Sarbeessaa irraa abbaan manaa ishee ijoollee daa’ima kudhan irratti gatee waan boqoteef yeroo yeroon deddeebi’ee hordofuun gaaddisa ta’ee roorroo irraa eeguun, gorsuu fi karaa qabsiisuun akka abbaatti hordoffii cimaa gochuun guddisee iddoo gaarii geessisee jira. Sarbeessaan hanga lubbuun jirutti ittigaafatamummaa biyyi, ollaa fi maatiin itti kennatu dhugaa irratti hundaa'uun dirqama isaa waan bahatuuf akka malee namaan jaalatamaa jiraate. Gaarummaa isaa kanarraa ka’uun  Sarbeessaan umurii dheeraa jiraatee darbus namni du'a isaa yeroo dhaga'u imimmaan kan roobsuuf seenaa gaarii oolmaa isaa kaleessaa kana irraa kan ka’edha. Obboo Sarbeessaa Faajjii umuriin isaa gaa’ilaaf yoo gahu Aaddee Baayyee Qalbeessaa fuudhee  ishee irraas ijoollee shan( dhiira lamaa fi dubara sadi) argatee osuma waliin bultii gaarii jiraachaa jiranii isheen akka tasaa dhukkubsattee boqotte. Achii booda ijoollee sagal kan argate yoo ta'u amma lubbuun kan jiran kudhanidha. Yeroo ammaa Obboo Sarbeessaa Faajjii akaakayyuu 77 fi akaakilee 25 horee jira. Waliigalatti horteen maatii isaa ijoollee isaa dabalatee kan lubbuun jiran namoota dhibbaa fi kudha lamadha. Obboo Sarbeessaan bara darbe akka malee dhukkubsatee kan ture yoo ta’u yaaliin gaarii godhameefii deebi’ee fayye. Yeroo du’aaf sodaatamu darbee gaafa guyyaan isaa geessu ganna baasee birraa bariisifatee sokke. Obboo Sarbeessaa Faajjii osoo kabajamee biyyaa fi maatii isaan akka malee jaalatamuu umurii isaa waggaa 89tti gaafa Sanbata Xiqqaa gaafa guyyaa 01/02/2018 halkan waarii sa'aatii 7tti boqotee gaafa Kibxataa gaafa guyyaa 03/02/2018 bataskaana Sillaasee Ganda Doobbiitti argamutti sirni awwaalcha isaa geggeeffame.