KAĞIZ və QƏLƏM HƏDİSİ: ÖMƏRİN ALLAH RƏSULUNA İTAƏTSİZLİYİ

Allah rəsulu vəfatından bir neçə gün əvvəl evində ziyarətinə gəlmiş səhabələrə əmr edir ki, ona kağız-qələm gətirsinlər və o, elə bir vəsiyyət yazsın ki, ümmət ondan sonra yolunu azmasın. Bu barədə əhli-sünnənin ən mötəbər hədis toplularında, o cümlədən Buxari və Müslimin "Səhih" əsərlərində bir neçə hədis nəql edilir. Həmin hədislərdə bildirilir: İbni Abbas dedi: Peyğəmbərin vəfatı yaxınlaşanda, evdə aralarında Ömər bin Xəttabın da olduğu bir dəstə adam olarkən, Allah rəsulu buyurdu: "Gəlin sizə elə bir vəsiyyət yazım ki, ondan sonra heç vaxt yolunuzu azmayasınız." Ömər dedi: "Peyğəmbərin xəstəliyi ağırlaşdı. Yanınızda Quran vardır. Bizə Allahın Kitabı yetər!" Buna görə evdəki səhabələr ixtilaf etdilər və münaqişə edib dalaşdılar. Onlardan bəzisi: "Yazmaq üçün bir şey gətirin ki, Rəsulullah sizin üçün ondan sonra azmayacağınız bir yazı yazsın" - deyir, bəziləri də Ömərin dediyini deyirdilər. Onlar Peyğəmbərin yanında səs-küy və ixtilaflarını çoxaltdıqları zaman Allah rəsulu onlara dedi: "Yanımdan qalxıb dağılışın!" Ravi Ubeydullah bin Abdullah belə demişdir: İbn Abbas bu hədisin sonunda: "Ah, nə böyük müsibətdir o müsibət ki, səs-küy salmaları və ixtilafları üzündən Rəsulullah ilə səhabələri üçün yazmaq istədiyi bu yazı arasında bir pərdə oldu!" - dedi. (Buxari, "Səhih", Kitabul-İtisam, Şəri hökmlərlə müxalifət etməyin kərahəti babı, hədis 7366 və digər mənbələr.) Bu qəbildən olan hədislərdən açıq-aydın görünür ki, Allah rəsulu yataq xəstəsi olduğu vaxt vəsiyyət etmək üçün səhabələrdən kağız və qələm gətirmələrini istəyir, lakin Ömər bin Xəttab buna mane olur. Bu zaman ixtilaf yaranır: oradakı səhabələrin bir hissəsi Allah rəsulunun buyruğuna əməl etməyi tələb edir, digər qismi isə Ömərin sözünü söyləyirlər. Beləliklə, səhabələr arasında mübahisə yaranır və səs-küy Peyğəmbəri narahat edir. Bu haldan narahatlıq keçirən Allah rəsulu evindəki səhabələri evindən çıxmalarını tələb edir və onlar da oranı tərk edib gedirlər. Əhli-sünnədən olan bir çox alim və xətiblər sünnilərin səhih olaraq qəbul etdikləri bu hədisi elə bir şəkildə şərh etməyə çalışırlar ki, burada Allah rəsulunun itaətindən çıxmış Ömər bin Xəttabın sözügedən əməlinə haqq qazandırsınlar. Hələ üstəlik, bu əməlinə görə Öməri qınayan şiələri haqsız çıxarmağa çalışır, Ömərə böhtan atıldığını iddia edirlər. Bu videoda əhli-sünnənin sözügedən iddiası və ona verilən cavab öz əksini tapır.