🔥 Цәыббрамза 30, 2026-тәи ашықәс: Аҷандараа Аиааирамш азгәарҭеит

Есышықәсеиҧш сынтәагьы Аҷандара ақыҭа иқәынхо ауаа ишақәнагоу ала иаҧылеит цәыббрамза 30 аҽны Аҧсныжәлар иазгәарҭо Аиааирамш Аныҳәа Ду. Ари аҽны Аҷандара ақыҭа иаҭааит ақыҭа иалҵны иахьа Гагра, Ҧицунда, Гәдоуҭа, Аҟәа инхо ахаҭарнакцәа. Иҟан араҟа адепутатцәа, Гәдоуҭа араион Ахадара аусзуҩцәагьы. Ақыҭаҿ иаартын аишьцәа Ҳагаа ‒ Џьумбери Џыри Тыкәа-иҧацәа, насгьы Баҭал Сафарбеи-иҧа ‒ ргәалашәареи рыхьӡ-рыҧша акамыршәреи ирызку абаҟа. Ари аусмҩаҧгатә иалахәын Гәдоуҭатәи араионтә телехәаҧшраҿы аус зуа аҭыхыҩцәа, убри аҟынтә аҭыҧан сара анҵамҭа ҟасымҵаӡеит. Аиқәшәара анеилга аамышьҭахь уи иалахәыз гәыҧҩык ҳаҭааит Баҭал Сафарбеи-иҧеи, Џьумбери Џыри Тыкәа-иҧацәа Ҳагаа рҳаҭгәынқәа. Анаҩс саси ҧшәымеи зегьы наҧхьан Орчыҟәаа ргәараҭаҿ. Араҟа имҩаҧысит Аиааирамш иазкыз, шәаҳәаралеи кәашаралеи ирҧшӡаз ачаражәра. Анҵамҭа алгамҭаҿ шәахәаҧшырц ишәыдызгалоит еицырдыруа аҧсуа шәаҳәаҩы, ашәаҧҵаҩы Славик Амҷба 2025 шықәса, ҧхынгәымза 6 рзы иҭыхыз, аибашьрақәа ҩба ирызку ашәа шынаигӡоз узырбо авидеонҵамҭа.