IZABURI Y’IDOMINIKA YA 26 A. INYIGISHO: "UBWO IMVUGO YAWE IJANA N'INGIRO?"

Bavukanyi, murakaza kuri IJWI RY’IZABURI, ijwi ridufasha kuzirikana Ijambo ry’Imana no gukomeza urugendo rwacu rw’ukwemera. Muri iyi video, turazirikana ibisomwa vyo kuri Dominika ya 26 y’igihe gisanzwe, Umwaka A. Ubutumwa bw’uyu musi buraduhamagarira guhinduka vy’ukuri, kwicisha bugufi no kugaragaza ukwemera kwacu mu bikorwa. Mu gisomwa ca mbere, umuhanuzi Ezekiyeli aratwibutsa ko umuntu mubi ashobora guhinduka, akareka ububisha, agakora ubutungane maze akazigama ubuzima bwiwe. Aratwereka kandi ko n’umuntu yari intungane ashobora gutana inzira iyo aretse ubutungane. Ivyo bitwigisha ko ata muntu akwiye kwihebura kubera kahise kiwe, kandi ata n’umwe akwiye kwishira hejuru kubera ivyiza yakoze kera. Izaburi y’uyu musi iradutumirira gusaba Umukama kutuyobora iti: «Ndangira inzira zawe, Mukama, unyigishe amayira yawe.» Iyi ni isengesho ry’umuntu yicisha bugufi, yemera ko akeneye Imana kugira imwereke ukuri, imwigishe inzira nziza kandi imugirire impuhwe. Mu gisomwa ca kabiri, Pawulo araduhamagarira kugira umutima umwe, kwirinda ishari n’ubwishime, kwiyumvira ivy’abandi no gukurikiza akarorero ka Kristu. Yezu yaricishije bugufi, afata ishusho y’umusuku kandi aragamburuka gushika ku rupfu rwo ku musaraba. Mu Nkuru Nziza, Yezu atubwira umugani w’abana babiri. Umwe yavuze ati: «Sinshaka», ariko mu nyuma arisubirako aragenda. Uwundi yavuze ati: «Ndagiye, muhanyi», ariko ntiyagenda. Aha Yezu aratwigisha ko ibikorwa biruta amajambo. Kuvuga ngo «Ego, Mukama» ntibihagije iyo ubuzima bwacu butagaragaza ivyo Imana idusaba. Ariko n’uwigeze kwanka, iyo yicuza agahinduka, arashobora gusubira mu nzira y’ubutungane. Muri iki gihe co kuzirikana, twibaze: Mbega ukwemera kwanje kugaragarira mu bikorwa? Mbega ndashobora kwemera amakosa yanje nkisubirako? Mbega ndafise umutima wa Kristu wicisha bugufi? Mbega amajambo mvuga ajana n’ivyo nkora? Mbega ndemera ko Imana impindura kandi ikanyobora? Ubutumwa bw’uyu musi buratomoye: Ntitugume ku majambo gusa. Duhinduke mu bikorwa, twicishe bugufi kandi dukore ico Umukama ashaka. Ntimwibagire gukurikira IJWI RY’IZABURI, gukunda iyi video no kuyisangiza abandi kugira ngo Ijambo ry’Imana rishikire imitima myinshi. #IjwiRyIzaburi #DominikaYa26 #UmwakaA #HindukaVyUkuri #InkuruNziza #Izaburi #YezuKristu #IjamaboRyImana #EkleziyaGatolika