प्रगतीसाठी संवादाची आवश्यकता - इतरांशी आणि देवाशीही | Aniruddha Bapu Pravachan

आज समाजात लोकांमध्ये प्रत्यक्ष संवादच जवळपास नाहीसा झाला आहे. बहुतांश वेळा संवाद हा 'प्रत्यक्ष' न होता, सोशल मीडियावरूनच किंवा एसएमएस द्वारेच होतो. अनेकदा तर केवळ ईमोजीजनेच समोरच्याच्या मेसेजची बोळवण केली जाते. मानवस्वभावातील हा वाढता तुटकपणा मानवाच्या सर्वांगीण प्रगतीसाठी हानिकारक आहे. सद्‌गुरु अनिरुद्ध बापूंनी गुरुवार दिनांक ११ जून २०२६ रोजी केलेल्या पितृवचनात ह्याच विषयाला हात घातला. 'आपापसांतील संवाद असा तुटू देऊ नका, तो वाढवा' असे सद्‌गुरु बापूंनी ह्यावेळेस कळकळीने सांगितले. संवादाचे महत्त्व ठसविणारी, मुख्य म्हणजे देवाच्या कृपेचे महत्त्व अधोरेखित करणारी, एका गावातील अनाथ मुलाची एक भावस्पर्शी कथा बापूंनी ह्यावेळेस सांगितली. आईवडिलांच्या मृत्यूनंतर गावाच्या दयेवर जगणाऱ्या ह्या अनाथ अशिक्षित मुलाच्या जीवनात त्याच्या नकळत भक्ती कशी प्रवेश करते आणि मग त्याचे प्रयास आणि देवाची कृपा ह्यांनी त्याच्या जीवनात हळूहळू कसा आमूलाग्र फरक पडतो, हे ह्या कथेतून लक्षात येते. अनाथ असल्यामुळे तो प्रत्येक बाबतीत गावाकडून गृहीत धरला जातो. त्याचमुळे त्याचे लग्नही गावातील एका मूकबधिर मुलीशी लावून दिले जाते. पण गावाच्या अशा वागणुकीचा राग न धरता तो कसा सकारात्मक प्रतिसाद देतो, पत्नी मूकबधिर असली तरी तिच्यावरही प्रेमच करतो व म्हणूनच अंती कसा देवाच्या कृपेला प्राप्त होतो, ते ह्या कथेतून सुंदरपणे उलगडून समोर येते. त्याचबरोबर ह्या कथेतून हेही सत्य उमगते की भले आपण जगाच्या दृष्टीने कितीही नगण्य, उपेक्षित असू, पण देवाशी आपला संबंध नेहमीच 'वन-टू-वन' असतो, देवाचे आपल्यावरही बारीक लक्ष असते व आपण केलेल्या अगदी लहानातल्या लहान चांगल्या कामाचे देवाला कौतुकच असते! ही कथा ऐकताना, 'जगी ज्यास कोणी नाही, त्यास देव आहे' ही उक्ती जाणवल्याशिवाय राहत नाही. 'देवाची कृपा असेल तर मुका मनुष्य देखील बोलू शकतो आणि पांगळा मनुष्य देखील पर्वत चढू शकतो' ('मूकं करोति वाचालं, पंगु॔ लंघयते गिरीम्') हे वचन ही कथा अधोरेखित करते. ह्या सामान्य, अशिक्षित माणसाच्या आयुष्यात हे घडू शकते, तर आमच्या आयुष्यात का नाही घडणार; मात्र त्याकरिता 'एक विश्वास असावा पुरता, कर्ता हर्ता गुरु ऐसा' हा दृढविश्वास पाहिजे, असे सद्‌गुरु बापूंनी शेवटी आश्वस्त केले. #AniruddhaBapu #MarathiPravachan #BhaktiMarg #Spirituality ©℗ ---------------------------------- Join the WhatsApp Channel - https://whatsapp.com/channel/0029Vb9c... For more information about Sadguru Shree Aniruddha (Bapu) - Aniruddha Devotion Sentience site - https://aniruddha-devotionsentience.com/ Samirsinh Dattopadhye blog - https://sadguruaniruddhabapu.com Watch live events - https://www.aniruddha.tv Know more about the Devotional Services carried out under the guidance of Sadguru Shree Aniruddha (Bapu) - http://www.aniruddhasadm.com https://aniruddha-aadeshpathak.com ----------------------------------