9 DITËSHI I SHËN NËNË TEREZËS - DITA 6

NËNTËDITËSHI KUSHTUAR SHËN NËNË TEREZËS Dita e gjashtë Të meditojmë me Nënë Terezën! Bashkësia ime janë të varfrit. Siguria e tyre është e imja. Shëndeti i tyre është i imi. Shtëpia e tyre është e imja. Fëmijëve dhe të varfërve, të gjithë atyre që vuajnë, jepjani, jo vetëm kujdesin tuaj, por edhe zemrën tuaj. Sepse jeta e atyre që askush nuk iu afrohet, për arsye se janë të infektuar, plot mikrobe dhe qelbësirë; e atyre që nuk shkojnë në lutje, sepse s’mund të dalin nga shtëpia të zdeshur; e atyre që nuk mund të hanë, sepse s’kanë fuqi; e atyre që rrinë nëpër trotuare, duke e ditur se po vdesin dhe që përskaj tyre kalojnë njerëzit dhe as nuk i shikon... është e imja. Shtëpia e tyre është e imja. Bota e tyre është e imja. Në zemrën time ka vend për ta, por edhe për shumë të tjerë, për të gjithë. Mëkati më i madh është: mungesa e dashurisë, moskujdesi për të afërmin. Vendosja e një fotografie me të varfër pranë ikonës së Nënë Terezës e përcjell një shpjegim i shkurtër: Të varfrit për Nënë Terezën ishin vetë Jezusi, që përmes tyre thoshte: Kam etje për dashuri, për butësi, për mirëkuptim, për ndihmë, për pranim, për falje. Ndërmjetësia e Shën Nënë Terezës bëftë, që fjalët e Krishtit: “Sa herë që i keni ndihmuar një të varfëri, më keni ndihmuar mua” (krh. Mt 25, 31-46), të bëhen për Kishën dhe për institucionet shtetërore program jete dhe stil, me të cilin ju qasen varfërive të ndryshme dhe të shumta të shoqërisë sonë. Lutja kushtuar Shën Nënë Terezës Shën Nënë Tereza e Kalkutës, ti që të varfrit i vendose në qendër të preokupimit tënd, bëj që ne të pranishmit dhe të gjithë ata që e kanë dëgjuar fjalën e Krishtit, të mos jemi indiferent, kur një vëlla apo një motër e jona ka nevojë për ndihmën tonë! Nxirre hirin nga zemra e Jezusit, që vendet dhe njerëzit e pasur të kujdesohen për të varfrit dhe të jenë të barabartë në shpërndarjen e të mirave tua! Ndihmona të kuptojmë se mëkati më i madh, që njeriu mund të bëjë është mungesa e dashurisë dhe moskujdesi për të afërmin! Amen. Angazhimi personal – të gjithë së bashku me zë të lartë: Meqenëse Jezusi na ka porositur, se dera nëpër të cilës kalohet në Parajsë është dashuria ndajë nevojtarëve, e pranoj angazhimin se do të mundohem ta mbajë të hapur gjithmonë këtë derë.