{جسم كمنجة}(00) إوعى يغرك جسمك!

بقينا بنسمع كتير مؤخرا عن حوادث خطف و قتل عشان سرقة أعضاء.. أو ناس من فقرها بتبيع أعضاءها و حاجاتها بمبالغ كبيرة.. طب ياترى لو الواحد حب يوفر فلوسه و يعمل بني آدم في البيت على ايديه.. هايتكلف كتير؟ تفتكر مقادير عملي البني آدم تتكلف كام؟ قريت مرة زمان.. ان العناصر المكونة لجسم الإنسان موجودة كلها في كبشة تراب..مثلا.. و يبقى عندك كل اللي انت محتاجه عشان تعمل بني آدم طازة.. تخيل.. ده آخرك؟ معقولة احنا بالرخص ده؟ للدرجة دي؟ كتير من العلماء حاولوا قبل كده من باب التسلية يحسبوا كمية و قيمة العناصر اللي بتكون جسم الإنسان.. لكن يمكن أحدثهم و أشهرهم.. المحاولة اللي عملتها الجمعية الملكية البريطانية للكيمياء في 2013 في مهرجان كامبريدج للعلوم. لما قعدوا يحسبوا كمية و قيمة العناصر اللازمة لعمل عدد واحد "بنديكت كامبرباتش" Benedict Cumberbatch. .. اللي كان أحد حضور المهرجان.. و لقوا انهم إجمالا..هايحتاجوا لتسعة وخمسين عنصر عشان يطبخوه.. منها الكربون والأكسجين والهيدروجين والنيتروجين والكالسيوم والفوسفور..اللي بيمثلوا حوالي ٩٩٪ من أجسامنا.. العجيب بقى.. ان الـ١٪ اللي فاضلين.. واللي لايمكن نقدر نعيش من غيرهم.. يعني ال٩٩٪ دول مش كفاية عشان يعملوا بني آدم.. الـ١٪ دول كان فيهم عناصر غريبة.. زي الـ (موليبدينوم molybdenum) ، أو (الفاناديوم vanadium) أو ال (مانجنيز) و القصدير والنحاس! و الغريب ان اللي محتاجينه من العناصر دي كميات قليلة جدا جدا.. بس الطبخة لا يمكن تكمل من غيرهم.. حاجة كده زي ورك نملة يتيمة متطلقة!.. كميات بتتقاس بأجزاء من المليون.. بل و أحيانا من المليار.. مثلا.. فاحنا محتاجين 20 ذرة كوبالت بس.. و 30 ذرة كروم بس.. أما المكون الأكبر بقى اللي واخد حيز ٦١٪ من جسم الانسان.. فهو الاكسجين.. تخيل انك كإنسان.. تلتينك هوا!.. بس احنا مابنتنططش زي البلالين بسبب ان الأكسجين ده كله أغلبه مرتبط بالهيدروجين.. و اللي بيمثل ١٠٪ من جسمك برضه.. بيرتبطوا مع بعض في صورة المية اللي في الجسم.. و دي من المفارقات الغريبة.. ان عنصرين من أخف العناصر اللي في الطبيعة.. الأكسجين و الهيدروجين.. لما يرتبطوا ببعض.. يتحولوا لعنصر ثقيل زي المية.. الأكسجين والهيدروجين كمان من أرخص العناصر اللي بتكون جسمك.. كل الأكسجين اللي محتاجينه يادوب يتكلف ١٤ دولار.. و الهيدروجين يادوب ٢٦ دولار.. النيتروجين كمان أرخص منهم.. النيتروجين اللي بيكون حوالي ٢.٥ ٪ من جسمك.. تكلفته حوالي نص دولار بس.. يابلاش.. بس بعد كده الميزانية بتضرب للأسف.. احنا محتاجين حوالي ١٣ و نص كيلو كاربون.. و دول يتكلفوا حوالي ٧٠ الف دولار.. حسب كلام الجمعية الملكية البريطانية.. و دول طبعا أكيد ما بيستعملوش غير خامات نضيفة و أصلي.. جايز عشان كده غالية.. مش هاييجوا عند بنديكت كامبرباتش و يسترخصوا يعني.. الكالسيوم بقى.. و الفوسفور ، والبوتاسيوم.. و على الرغم من اننا محتاجين منهم كميات أقل بكتير.. فهايتكلفوا حوالي ٧٤ الف دولار.. و معظم باقي العناصر أغلى كمان من كده.. بس الحمد لله مش محتاجين منها الا كميات مجهرية.. الثوريوم مثلا تمن الجرام الواحد منه أكثر من 3000 دولار.. بس بيشكل يادوب واحد من ١٠ مليون ٪ من الجسم.. فاحنا مش محتاجين منه غير يادوب قيمة حوالي ٣٠ سنت.. ثلث دولار يعني.. كل القصدير اللي محتاجينه يتكلف حوالي ٦ سنت.. الزركونيوم و النيوبيوم كل واحد ٣ سنت.. الساماريوم اللي بيمثل ٧ من المليار من جسم الانسان هاناخده ببلاش فوق البيعة.. للدعم على Patreon :   / ahmedbehiry   اشترك في القناة الرسمية على تليجرام: https://t.me/ABehiry الصفحة الرسمية لاحمد بحيري علي الفيسبوك   / أحمد-بحيري-ahmed-behiry-109415711865636   الصفحة الرسمية علي تويتر   / ahmedbehiry   اشترك في القناة لمتابعة الحلقات الجديدة http://goo.gl/2KheJZ المصادر: أعلم أهل الأرض داباليو داباليو داباليو دوط قووقل دوط قوم http://www.قooقle.com