Ақтөбелік ерлі-зайыпты 27 жылдан бері із-түссіз жоғалған ұлдарын таппай тығырыққа тірелген

Ақтөбелік ерлі-зайыпты 27 жылдан бері із-түссіз жоғалған ұлдарын таппай тығырыққа тірелген. Үйдің тұңғышы Руслан Сабыров дүкенге қант алуға шығып, хабар-ошарсыз кеткен. Содан бері азаматты көрдім-білдім деген жан табылмапты. Бірақ ата-ананың үміті үзілген емес. Олар балаларының тірі екеніне сенімді. Сондықтан іздестіру жұмыстарын бір сәтке де тоқтатпаған. Көпшіліктен көмек сұраған зейнеткерлерді әріптесім тыңдап келді. Бұл - сексенге таяған Алмаш Сабырова. Арада 27 жыл өтсе де, ұлын бір күн де ойынан шығармаған. Руслан 1999 жылдың 22 наурызында үйден қант алуға шығып кеткен екен. Содан үйіне қайтып оралмаған. Ата-анасы полицияға да арыз берген. Бірақ әлі күнге дейін көрдім білдім деген тірі жан табылмапты. АЛМАШ САБЫРОВА, Руслан Сабыровтың анасы: Тірі екеніне сенімдімін. Бірінші кездерде, конечно, жүрегім дүрсілдеп, жаңағы, тұла бойым дірілдеп, біреу өтіріп тастады ма деп. Өлтіріп тастаса, ең болмағанда сүйегі табылады ғой деп ойладым да. Полициялар да сөйтіп айтты: «Өлтіріп тастаса сүйегі табылмай ма?» – деп. Сосын содан успокоилась, Сосын содан күту, күнде күту. Әне келеді, міне келеді. Ата-анасының айтуынша, Руслан Сабыров жоғары оқу орнын заңгер мамандығы бойынша тәмамдаған. Қазақ, орыс және ағылшын тілдерін еркін меңгерген. Отбасын құрып, өмірден өз орнын тапқан азамат. Үйден шыққан кезде жасы 29-да болыпты Сол жылдары жанұясы Хромтаудан Ақтөбеге қоныс аударып, шағын дәмхана ашқан екен. Алғашында дәмханаға қарызға тамақ ішетін жігіттер ұлымызға зиянын тигізді ме?» деген күдік те болған екен. Алайда бұл жорамал да расталмаған көрінеді. ШӘМШАДИН САБЫРОВ, Руслан Сабыровтың әкесі: Қайтарады баламды, қорықпа, жылама, беспокойся етпе. Мен сенем баламның қайтып келетіндігіне. Ол өзі грамотный бала. Ағылшынша сөйлейді, орысша сөйлейді, қазақша сөйлейді. Любой адаммен тіл табысып сөйлесіп кете береді. Любой уақытта біреуге көмектесіп жүреді. Анасы «баламды біреу құлдықта ұстап отыр ма» деген күдіктің де көкейінен кетпейтінін айтады. Ал облыстық полиция департамент іздестіру жұмыстары жүргізіліп жатқанын хабарлады. ЕРБОЛАТ САРҚҰЛОВ, Ақтөбе облыстық полиция департаменті баспасөз қызметінің жетекшісі: Ақтөбе облыстық полиция департаментімен 1969 жылы туылған Сабиров Руслан Шамсадинұлын іздестіруде. Аталған азамат 1999 жылы үйден кетіп, қазіргі таңға дейін оның мекен-жайы, тұрғылықты жері анықталмаған. Іздестіру жұмыстары жалғастырылуда. КӘМШАТ ҚОПАЕВА, тілші: Ерлі-зайыпты зейнеткерлер тұңғыш ұлдарының тірі екеніне сенімді. Бақсы-балгер аралап, табаны тозған жандар үміт үзбей, іздестіру жұмыстарын жалғастыра бермек. Қос қарияның бүгінгі жалғыз тілегі – ұлдары туралы қандай да бір хабар есту. Сондықтан Русланды көрген не оның тағдыры жайлы қандай да бір мәліметті білетін жандар болса хабарласуды сұрайды. #Информбюро #РусланСабыров #Ақтөбе #Новости #31канал