San Lucas 10, 25-37. Lunes 5 de octubre 2026. Evangelio en Q'eqchi'.

Evangelio en Q'eqchi'. Lunes 5 de octubre 2026. San Lucas 10, 25-37 Ak taaxaqliiq jun aj nahol Chaq'rab' re xyalb'al rix li Jesus, ut kixye: --At Tzolonel, k'aru tinb'aanu re naq tweechani li junelik yu'am? Li Jesus kixye re: --K'aru tz'iib'anb'il sa' li Chaq'rab'? K'aru nakawil chisa'? Kichaq'ok a'an ut kixye: --Taara li Qaawa' laaYos chi anchal aach'ool, chi anchal aawaanm, chi anchal aametz'ew ut chi anchal aak'a'uxl; ut taara laawas aawiitz'in jo' naq nakara aawib' laa'at. Kixye li Jesus re: --Xasume chi chaab'il. B'aanu a'an ut taawanq aayu'am. Laj nahol Chaq'rab' kiraj xch'olob'ankil xyaalal li xpatz'om, jo'kan naq kixye re li Jesus: --Ani li was wiitz'in? Kichaq'ok li Jesus ut kixye: --Jun li winq ki'elk chaq Jerusalén. Yo chi kub'eek Jerikó naq kit'ane'k sa' ruq'eb' laj elq': ke'xmaq' jo'ch'inal jo'nimal wank re, ke'xteni chi che' ut kamk re ke'xkanab'. Ut sa' ajwi' li b'e a'an yo chaq chi kub'eek jun aj tij; naq kiril li winq a'an, kixq'otb'ehin. Jo'kan ajwi' kixb'aanu jun aj Leví li yo chi nume'k aran: naq kiril li winq a'an, kixq'otb'ehin. “Ab'an jun aj Samaria li yo chi nume'k aran, kiwulak wan wi' li winq ut, naq kiril, kixtoq'ob'a ru. Kijilok chi xk'atq, kixhoy aseeyt ut b'iin sa' li xtiq'ilal, toja' naq kixb'ati ru. Chirix chik a'an kixtaqsi sa' xb'een li xxul, kixk'am sa' jun ochochnaal, ut a'an ki'ilok re. Eweraq chik a'an, kirisi sa' xb'ools o'k'aal chi tumin ut kixk'e re laj eechal re li ochochnaal, ut kixye: «Chawilaq we, ut jo'nimal chik taasach chirix, sa' linsutq'ijik tolintoj aawe». “Ani reheb' li oxib' a'in nakak'oxla laa'at naq a'an tz'aqal ras riitz'in li kit'ane'k sa' ruq'eb' laj elq'?”. Kichaq'ok laj nahol Chaq'rab': --A' li ki'uxtaanank u. Ut li Jesus kixye re: --Ayu ut jo'kan ajwi' chab'aanu laa'at. Raatin li Qaawa'.