لو انت مؤجر أو مستأجر ازاى تضمن حقك في عقد الايجار بالصيغة التنفيذية ؟

حلقة النهاردة عن الصيغة التنفيذية لعقد الايجار وببساطة ده اجراء بتعمله في الشهر العقارى وبيحول عقد الايجار من مجرد ورقة عرفيه لورقة بتعامل معامله الحكم القضائي ووفرت عليك سواء كنت مالك أو مستأجر ترفع قضية في المحكمة ووفرت عليك وقت ووفرت عليك مصاريف قضائية كل ده بخطوات بسيطة حنعرفه في حلقه النهاردة . ناس كتير متعرفش ان في سنة 2006 تم تعديل قانون العلاقة الايجارية بين المالك والمستأجر وان التعديل ده بيسمح للمالك والمستأجر ان عقد الايجار اللى معاهم يعامل معامله الحكم القضائي لكن بشروط حددها القانون ايه هيه الشروط ؟ الشرط الاول :- أن يكون العقد مكتوب مش شفوى متحدد فيه / بيانات اطراف العقد / موضوع العقد الشقة او المحل او اى مكان يصلح في العقار يتأجر مخزن بدروم روف / مدة العقد وبدايته ونهايته وممكن تحط شرط ان اى طرف ملتزمشي باي شرط يعتبر العقد مفسوخ من تلقاء نفسه . الشرط الثاني : أن العقد يتوثق في مكتب الشهر العقارى اللى تابع ليه العقار الشرط التالت : ان اطراف العقد يروحوا مع بعض المؤجر والمستأجر ومش حينفع حد يروح لوحدة لازم الاتنين مجتمعين . الشرط الرابع : ان مدة العقد متزيدشي عن تسع سنين ممكن سنة اتنين تلاتة معاك لحد تسع سنين عشان الاجراء يتعمل . الشرط الخامس : اخر شرط في نهاية عملية التوثيق بتتحط الصيغة والعبارة الشهيرة: "على الجهة التي يناط بها التنفيذ أن تبادر إليه متى طلب منها وعلى السلطات المختصة أن تعين على إجرائه ولو باستعمال القوة متى طلب إليها ذلك". ايه الحقوق اللى بتكسبها بعد توثيق العقد ويبقي عليه الصيغة التنفيذية ؟ لو حد من أطراف العقد أخل بأى شرط من شروط الابجار في اى وقت لو مثلا المستأجر مدفعش الايجار اوممتنع عن تسليم العين أو المالك ملتزمش برد مبلغ التأمين ما عليك سوى اتباع الاجراءات المقررة أكن معاك حكم قضائي وبتروح تعمل انذار بده وبعد كدة بتروح ادارة التنفيذ بالمحكمة الواقع في دايرة العقار وتنفيذ الشرط المنصوص عليه من غير رفع قضية في المحكمة . رسوم مكتب الشهر العقارى الرسم هنا مختلف عن اجراء اثبات التاريخ اللى بتعمله على عقد الايجار لان انت هنا بتحول عقد الايجار لمعاملة حكم قضائي والرسم بيكون عبارة عن نص في المية من قيمة اجمالي العقد بالاضافة الى نسبة 1 في المية من قيمة العقد بنقابة المحامين بالاضافة لرسوم الميكروفيلم ولو فيه تامين او شرط جزائي بيتم فرض رسم 2 % من المبلغ . في نهاية الحلقة اتمني اكون افدتكم وأي استقسار تقدروا تكتبوه أو تبعتوه على الواتس اب وأشوفكم في حلقة جديدة من مفاهيم قانونية كان معاكم محمد عبد العزيز المحامي بالنقض .