MBUNGE WA JIMBO LA TANGA AKABIDHI MADAWATI 629 KWA SHULE ZA MSINGI ZA HALMASHAURI YA JIJI LA TANGA

Mbunge wa Jimbo la Tanga Mjini Mh Kassim Mbarak amekabidhi jumla ya madawati 629 kwa shule za msingi za Halmashauri ya Jiji la Tanga, ikiwa ni sehemu ya jitihada za kuboresha mazingira ya kujifunzia na kuongeza ufaulu wa wanafunzi katika shule za msingi na awali zenye uhitaji zaidi wa madawati. Madawati hayo yamegawanywa katika shule tisa (9) za msingi za Halmashauri ya Jiji la Tanga, ambapo Shule ya Msingi Pongwe, Magaoni, Kigandini, Mafuriko, Kasera, Usagara, Msambweni na Machui kila moja imepatiwa madawati 70, huku Shule ya Msingi Msara ikipatiwa madawati 69. Mgawanyo huo unafanya jumla ya madawati yaliyokabidhiwa kufikia 629, hatua inayolenga kupunguza changamoto ya upungufu wa madawati katika shule hizo na kuwawezesha wanafunzi kupata mazingira bora na rafiki zaidi kwa ajili ya kujifunza. Akizungumza wakati wa makabidhiano hayo, Mh Kassim Mbarak amesisitiza umuhimu wa kuweka mazingira bora ya elimu, akieleza kuwa upatikanaji wa madawati ya kutosha ni sehemu muhimu katika kuhakikisha wanafunzi wanajifunza katika mazingira yenye utulivu, usalama na yanayochochea umakini darasani. Aidha, ameeleza kuwa kuboresha miundombinu na vifaa vya kujifunzia ni hatua mojawapo ya kuwawezesha wanafunzi kuongeza bidii katika masomo na hatimaye kuboresha ufaulu wa kitaaluma katika shule za Halmashauri ya Jiji la Tanga. Kwa upande wake Naibu Meya wa Jiji la Tanga Mh Khalid Hamza amepokea hatua hiyo kama sehemu ya jitihada za pamoja kati ya viongozi, Serikali na wadau wa elimu katika kuhakikisha changamoto zinazowakabili wanafunzi na walimu zinapunguzwa. Amesema kuwa madawati hayo yanatarajiwa kuwa na mchango katika kupunguza msongamano wa wanafunzi darasani, kuwawezesha wanafunzi kukaa katika mazingira yanayofaa wakati wa masomo na kuongeza ufanisi wa ufundishaji na ujifunzaji.