第一行親眼見證 Tom Jones 嘅傳奇

最近英國殿堂級歌手Tom Jones變咗英國娛樂新聞人物焦點，itv嘅the voice uk公布新一季導師陣容，由2012年開始擔任好多季導師嘅 Tom Jones，今季就會離開。 Tom Jones 之後親自發表聲明，表示自己其實並唔想離開《The Voice UK》，而係 ITV 作出咗呢個決定。佢甚至用被炒嚟形容。 事件隨即引起唔少迴響，有支持 Tom Jones 嘅歌迷甚至發起聯署，希望節目可以重新考慮，畀呢位傳奇歌手繼續留低。 我自己覺得tom jones比任何人都有資格做導師，Tom Jones 本身就係一部活生生嘅流行音樂歷史。喺60年代，1965年憑住it’s not unusual呢首歌一炮而紅，之後嘅what’s new Pussycat, Green Green Grass of home, Delilah紅遍全球。1999年嘅sexbomb迎來另一個事業高峰。 而更加難得嘅係，佢並冇停喺昔日嘅輝煌。 2021 年，Tom Jones 推出專輯《Surrounded By Time》，入面有一首歌，我自己非常鍾意。 就係——〈I Won’t Crumble with You If You Fall〉。 呢首歌對 Tom Jones 嚟講，其實有非常特別嘅意義。 當時 Tom Jones 嘅太太 Linda 肺癌末期，身體已經非常虛弱 Tom Jones 曾經講過，自己當時甚至覺得，可能再冇辦法繼續唱歌。 但 Linda 就叫佢唔好跟住自己一齊倒下。 就算有一日佢離開咗，Tom Jones 都要繼續生活，繼續唱歌。 所以呢首歌對 Tom Jones 嚟講，並唔只係一首普通嘅歌，係唱緊自己生命入面一段非常深刻嘅經歷。 就算人生有一日跌到最低谷，都仍然要繼續行落去。 就咁聽落其實好簡單。 但當一個已經八十歲，用自己人生歷練唱出嚟嗰種感覺，好感動 舊年我好幸運地去咗佢嘅演唱會，等咗四個鐘排咗第一行，佢嘅聲音好震撼，一開聲已經俾佢吸引住，都解釋到點解紅足60年。而家俾大家欣賞下我最鍾意嘅三首作品，下次再見