მოსკოვის ეკონომიკა ჩვენს ხარჯზე ძლიერდება - რა არის გამოსავალი? - ეპიზოდი - #12

უკრაინაში რუსეთი სრულმასშტაბიან ომს აწარმოებს და უკვე მესამე წელია, უდანაშაულო, მშვიდობიან მოქალაქეებს ხოცავს. ამის გამო დასანქცირებულ ოკუპანტს კი მაშველ რგოლად საქართველოც მოევლინა. რუსეთს სანქცირებული პროდუქციით ხან ვამარაგებთ, ხან პირიქით, მისგან მოგვაქვს და ევროპაში ვუსაღებთ. შედეგად, მოსკოვის ეკონომიკა ძლიერდება, ჩვენი ქვეყნის იმიჯი და საერთაშორისო სანდოობა კი მნიშვნელოვნად ზიანდება. რა უნდა გააკეთოს სახელმწიფომ, რომ გაშიფროს და აღკვეთოს რუსეთის სასიკეთოდ აწყობილი სანქციებიდან თავის არიდების სქემები? ამაზე მკაფიო პასუხს ჩვენს პოდკასტში მოისმენთ. ანალიტიკოსი დავით მაისურაძე გვიხსნის, რომ გამოსავალი სახელმწიფო სტრუქტურების მეტი სიფხიზლეა - მათ შორის, საზღვარზე საქონლის ჩხრეკის გამკაცრება და გახშირება, აკრძალული საქონლის რუსეთიდან იმპორტზე დამატებითი შეზღუდვების დაწესება - ეს შეიძლება იყოს ეროვნული სანქცია. გარდა ამისა, გამოსავალია ექსპორტიორი კომპანიების გამჭვირვალობის გაზრდა - უნდა დაევალოთ, გაასაჯაროონ ან სახელმწიფო სტრუქტურებს წარუდგინონ, თუ ვისთან აქვთ გაჩაღებული ვაჭრობა. ვინ არის მათგან შემძენი თუ გადამყიდველი კომპანია. ანუ, ქართულმა მხარემ უნდა იცოდეს, სად მიდის საბოლოოდ ჩვენი ტერიტორიიდან წასული ნივთი. ამ ეპიზოდში მოსმენთ, როგორ გაუმკლავდა იგივე პრობლემას ლიეტუვა. ანუ, გამოსავალი არსებობს და თუ საქართველოს მთავრობა რუსეთისთვის ხელის გაწვდენას აღარ მოისურვებს, შეუძლია გაკვეთილი ლიეტუვიდან ისწავლოს.