Chicken Nihari | Nihari Recipe | Nihari Banane Ka Tarika...

Aaj maine ghar par bohat hi mazedar Chicken Nihari banayi hai. Nihari aap chicken, beef ya mutton kisi bhi gosht se bana sakte hain. Maine aaj is recipe ke liye chicken use kiya hai. Chicken Nihari banane ke liye sab se pehle ek degchi mein oil garam karein. Oil garam hone ke baad is mein do bareek kate hue pyaz add karein aur inhein golden brown hone tak fry karein. Jab pyaz achi tarah golden brown ho jaye to isay oil se nikal lein. Kuch pyaz blend karne ke liye rakh lein aur kuch garnish ke liye. Ab isi oil mein chicken add karein aur achi tarah bhunai karein. Jab chicken ka kachapan khatam ho jaye to is mein fresh lehsan ka paste add karein aur dobara achi tarah bhun lein. Ab is mein Nihari masala add karein. Agar aap ready-made Nihari masala use kar rahe hain to zyada masalay add karne ki zarurat nahi hoti. Is ke baad blended hari mirchein add karein. Saath hi haldi, dhania powder, pisi hui lal mirch aur namak add karein aur tamam masalon ko achi tarah bhun lein. Doosri taraf ek bartan mein utna pani garam karein jitna aapko Nihari ka shorba banana hai. Jab pani mein boil aa jaye to is garam pani ko chicken ke masalay mein add kar dein aur degchi ko dhakkan se cover karke achi tarah pakne dein. Agar aap Nihari mein mazeed kharay masalay add karna chahein to kharay masalon ko pehle halka sa roast karein, phir unhein blend karke Nihari mein add kar sakte hain. Nihari ko thick aur perfect consistency dene ke liye gandum ka aata lein aur isay halki aanch par taway par bhun lein. Jab aate se achi khushboo aane lage to isay fried pyaz ke saath blend karein. Is mein thora sa pani add karein. Aap chahein to is mixture mein thora sa dahi bhi add kar sakte hain. Is mixture ko achi tarah blend karne ke baad Nihari mein add karein aur saath saath chamach chalate rahein taake lumps na banen. Kuch der pakne ke baad hamari bohat hi mazedar aur thick Chicken Nihari bilkul ready ho jati hai. Ab Nihari ko serving dish mein nikal lein aur fried pyaz, kate hue lemon, bareek kati hui adrak aur hari mirchon se garnish karein. Is delicious Chicken Nihari ko naan, roti ya kisi bhi apni pasand ki bread ke saath serve karein. Yeh Nihari bohat hi mazedar aur lazeez banti hai. Aap is recipe ko zaroor try karein aur mujhe comments mein batayein ke aapko Chicken Nihari kaisi lagi. Agar video achi lage to video ko Like, Share aur Comment zaroor karein. Aur agar aap mere channel par naye hain to channel ko Subscribe karna bilkul na bhoolen. ❤️ #ChickenNihari #NihariRecipe #ChickenRecipe #NihariBananeKaTarika #PakistaniFood #DesiFood #HomemadeNihari #ChickenRecipes #PakistaniRecipes #FoodRecipe