講座系列 (五): 《爸爸，你有幾了解自己個孩子？》| 線上好爸爸專題講座 | 維護家庭基金好爸爸中心 SENFathering

「點解喺屋企做唔到，返到學校又做到？」 「點解同爸爸出街冇事，同媽媽就完全唔同？」 「究竟係孩子難，定個環境令佢變得好難？」 今次《線上好爸爸專題講座》第五課，有近30位SEN爸爸一齊上線。我哋邀請到顧問職業治療師雷翠雯 Frances，同爸爸由一個幾簡單、但其實唔容易答嘅問題開始： 💬「你有幾了解自己個孩子？」 Frances 帶我哋戴上「三副眼鏡」重新睇孩子：孩子本身、身處嘅環境，以及孩子同環境之間嘅互動。 其中一個我幾深刻嘅提醒係，同一個孩子，可以喺唔同環境「判若兩人」。 有時我哋見到孩子唔合作、發脾氣、做唔到，就好容易第一時間問：「佢點解又係咁？」 但今堂提醒爸爸，可以試下轉一轉條問題： 👉 係孩子本身有困難？ 👉 定係環境太嘈、太多人、太多要求？ 👉 係支持唔夠？ 👉 定其實方法啱，只係時機未啱？ 更加重要嘅係，爸爸自己都係孩子環境嘅一部分。 我哋當日有幾攰、有幾急、情緒好唔好、仲有幾多耐性，都可能影響孩子嘅反應。 所以了解孩子，唔係淨係記住佢「有咩診斷」、「有咩問題」。我哋要慢慢學識睇到：佢鍾意乜、驚乜、需要乜、咩環境最容易成功，甚至佢有啲咩強項，我哋一直冇留意。 Frances 仲教咗爸爸一個幾實用嘅「3分鐘溝通框架」。下次見醫生、老師或者治療師，唔使只講「佢最近好曳」或者「佢成日發脾氣」，而係將孩子嘅狀態、當時環境、發生咗咩事，同埋咩情況之下佢其實做得到，講得更加具體。 講座去到最後，我特別鍾意 Frances 講「感恩」嗰部分。 好多時我哋做爸爸，眼光好自然會放喺「仲有咩問題要解決」、「仲有咩未做到」。但當我哋願意慢落嚟，先觀察、先理解，亦為眼前已經擁有嘅人同事感恩，我哋睇孩子嘅眼光都可能會有少少唔同。 有時會發現，孩子並唔係「專登玩嘢」，而我哋自己亦未必需要每次都即刻搵答案。 Frances 最後亦邀請爸爸，返去試下欣賞太太、欣賞孩子，諗一樣值得感恩嘅事。就算有時唔知點講出口，一個擁抱，都可以係一個開始。❤️ 做爸爸，我哋都仲係一路學緊。 ============= 👨‍👧‍👦 想繼續學習成為一個「夠好的爸爸」，歡迎加入第二屆《線上好爸爸證書課程》。 透過24個不同主題，我哋會邀請專家、過來人爸爸及專業同工，一齊陪伴爸爸學習 SEN 教養、親子溝通、情緒管理、夫妻合作，以及不同成長階段嘅同行。 📌 課程詳情及報名： https://www.familyvalue.org.hk/senfat... #好爸爸中心 #線上好爸爸課程 #SEN爸爸 #SEN家庭 #親子溝通 #職業治療 #GoodEnoughFather