Chapter 03 | Safar Imtehan Ka | سفر امتحان کا | Video Book: Manzil Se Aagey

Bismillah e Al Rahman Al Raheem Safar mai hamesha aise lamhe aate hain jab raasta aasaan nahi rehta. Kabhi pattharon se bhara track, kabhi ghane badal, kabhi lagataar barish, aur kabhi thakan jis se lagta hai bas ab aur nahi ho paayega. Magar asal mai yehi woh lamhe hote hain jo insaan ko test karte hain. Yehi woh waqt hai jab humari rooh, humari soch aur humare sabr ki asal parakh hoti hai.yahi wo experiences hen Jo insan make ya break krte hen... Ye mushkil raaste mushkil lamhaat humein ek ehem sabaq bhi dete hain: zindagi bhi isi tarah hai. Har din aasaan nahi hota. Har waqt khushi ka nahi hota, har Rasta predictable nahi hota. Magar jo waqt mushkil ka hota hai, wo deep down insaan ki shanakht banata hai. Insaan ko ane walay waqto k lye tayyar krta he. Angrezi ki mashoor kahawat he: what doesn't kill you, makes you stronger.... Aise lamhon mai aik bari quwwat hoti hai ek dosray ko sahaara dena. Ek positive nazariya share krna, apas mai hansi mazaq krlena, kisi saathi ka kandha ban jana, aik doosre ko realize krwana k us waqt hum Allah ki kitni naimato Se ghiray hue hen – yeh chhoti chhoti cheezen andar se himmat barha deti hain. Yehi hai safar Mai musbat logo k sath ki khoobsurti: hum sirf manzilon tak nahi pohanchte, hum ek dosray ke liye sahara aur positivity ki source bante hain. Aur phir, mushkil gharriyon mai bhi Allah ki rehmaten samne aati hen. Lagataar barish ke darmiyan ek chhoti si roshni, badalo k unique manzar, hiking k darmyan rest k lye suitable jaga, Kisi chataan ya darakht ka saya, ek manzar jo Allah ki musawwiri aur qudrat yad dila de... Ye chhoti chhoti positive cheezen hi insaan ko aage barhati hain. Qur’an mai Allah farmata hai: “Fa inna ma’al ‘usri yusra. Inna ma’al ‘usri yusra.” (Surah Insharah, 5-6) “Beshak har mushkil ke sath aasani hai. Har mushkil ke sath aasani hai.” asal mai safar humein yehi yaad dilata hai – ke barish k baad asmaan khulta he, Raat ke baad hamesha nayi subah hoti hai, thakan ke baad sukoon hota hai, aur mushkilat ke baad Allah apne bande ko naye rang aur naye manazir dikhata hai. Is chapter ke visuals mai jo aap ne dekhe – ghane badal, barish, kathan raaste – ye sirf paharro aur trekking ki kahani nahi hai. Ye humari zindagi ki misaal hai. Har mushkil raah ke baad ek khoobsurat manzar aata hai, aur har thakan ke baad ek nayi quwwat milti hai. Safar ki is manzil pe mujhe phir yehi samajh aya – jo insaan mushkilat mai Allah ko yaad karta hai, wo kabhi akela nahi hota. Wasalam, Hamza Hashmi 21 aur 22 July, Muchrri Se Khanda ki Hiking #hventure #travel #pakistan