«Ата-анаңның денсаулығы үшін бер». Садақаны сұрап алу қаншалықты дұрыс?

«Кофе ішкенше, жақсылық жаса» немесе «ата-анаңның денсаулығы үшін бер». Әлеуметтік желіде мешіт немесе медресе құрылысына қаржылай көмек көрсетіп, садақа беруді сұрайтындар күрт көбейді. Адамның ішкі сезіміне әсер етіп, сауапты сылтау ететіндердің әрекеті дұрыс па? Жалпы, садақа берудің жолы қандай? Әріптесім Дамир Нұрмұхамет дінтанушылар мен имамдардың пікірін біліп келді. Желідегі әрбір екінші видео – қайырымдылыққа шақыру. Садақа сұрау. Бірақ әдісі өзгеше. Басты тақырып – ата-ананың денсаулығы, баланың амандығы. Мұндай сөздер кез келген адамның жүрегін елжіретпей қоймасы анық. Алайда тұрғындардың көбі садақаны адамның жақынын сылтау етіп сұрау дұрыс емес деп отыр. Дінтанушы Жұмахмет Жайлаубаев құрылысқа үлес қос, сауап жаса деген желідегі видеолардан еш әбестік көрмейді. Ол садақаны сұраған адам емес, беруші мұқтаж деп түсіндірді. Ата-анаңның амандығы, деніңнің саулығы, жолыңның ашықтығы үшін жасалатын игі амал. Жалпы айтқанда ырысың мен берекең арту үшін жақсылық жасаудың айыбы жоқ, әр адамның өз еркі дейді. ЖҰМАХМЕТ ЖАЙЛАУБАЕВ, дінтанушы Мешіт, медресе ол білім алатын рухани орда. Олар жеке қара басына сұрап жүрген жоқ қой. Қоғамға, балалардың тәрбиесіне керек дүние болғаннан кейін сұрап жүр. Сұраса сұрай берсін. Берсеңіз де бермесеңіз де өз еркіңіз. ДАМИР НҰРМҰХАМЕТ, тілші: Исламда садақа өз ырқымен, таза ниетпен берілуі тиіс. Адамдарды міндеттеуге немесе қорқытуға болмайды. Мешіт-медресе салу үшін арнайы заңды рұқсаттар мен ресми қорлар бар. Ақшаны соған аударған жөн дейді мүфтият өкілдері. ХАМИТ ТАБАРАК, Жетісу облысының наиб имамы: Қазір интернетте көп адамдар садақа сұраудың форматын өзгерткен. Бұлай жасау дұрыс емес. Халық бергісі келген садақасын шын жүректен мұқтаж жанға береді. Олардың бәрін мұқтаж деп айта алмаймыз. Садақа барынша жасырын берілгені дұрыс. Пайғамбарымыз оң қолын бергенді сол қолың көрмесін деген. Наиб Имам жақсылықты сауатты түрде жасауға шақырады. Садақа беру – ізгі амал екені сөзсіз. Алайда психологиялық қысым арқылы ақша жинайтын парақшалардан сақ болған абзал дейді. Себебі, сауапты сылтау ететін кей парақшаларды алаяқтар да жүргізуі мүмкін. #Информбюро #31арна #БастыЖаңалықтар #Новости #31канал