Ақтөбеде іздеу жарияланған күдіктілердің аты-жөндері белгілі болды

Облыстық Ішкі істер департаменті терактіге қатысы болуы мүмкін тұлғалардың суреттерін таратты. Іздеу салынғандардың жалпы саны – 7 адам. Олар: Дмитрий Таңатаров – 1989 жылғы Ақтөбе қаласының тумасы, Әрсен Таңатаров – 1990 жылғы Ақтөбе қаласының тумасы, Айдос Жұбанов – 1985 жылғы Ақтөбе облысының тумасы, Бақыт Қуанышбаев – 1983 жылғы Қызылорда облысы Сырдария ауданының тумасы, Нұрлан Сейілов – 1985 жылғы Ақмола облысы Есіл ауданының тумасы, Әлібек Ақпанбетов – 1989 жылғы, Ақтөбе облысының тумасы, Айдар Башимов – 1988 жылғы, Ақтөбе облысы, Шалқар ауданының тумасы. Тәртіп сақшылары бұл адамдардың жүрген жері мен орны жайлы қандай да бір ақпарат білетін тұрғындарға тез арада жақын маңдағы полиция бекетіне хабарласуын сұрайды. Жалпы Ақтөбеде қарулы шабуыл жасағандарды ұстау операциясы әлі жалғасып жатыр. Алмас Сәдубаев, ҚР ІІМ Мемлекеттік тіл және ақпарат департаментінің директоры -Қазіргі таңда белсенді қарулы қақтығыстардың барысында 13 қылмыскердің көзі жойылды. 4-еуі жарақат алды, 7 қылмыскер іздеуде. Ішкі істер органдары іздеудегі қылмыскерлерді ұстау бойынша барлық шараларды қабылдауда. Қазіргі уақытта 8 күдікті ұсталды. Олардың қылмысқа қатысы тексерілуде. Ақтөбе қаласындағы жағдайға тоқталсақ, түн қалыпты жағдайда өтті. Қалада, сондай-ақ республика бойынша жағдай тұрақты. Толықтай бақылауда. Дегенмен, республика бойынша Ішкі істер органдары толық жеке құрамының қызметі күшейтілген режимде.