Amma onlar kimi olmaq istəyirəm...

Ey Allah! Sənə layiq olduğun şəkildə namaz qıla bilmirəm, Balığın qarnındaykən Yunus peyğəmbər kimi təsbeh edə bilmirəm, Xəstələndiyimdə Əyyub peyğəmbər kimi səbir edə bilmirəm, Amma onlar kimi olmaq istəyirəm, ey Allah! Sənin üçün Davud peyğəmbər kimi oruc tuta bilmirəm, Yəhya peyğəmbər kimi dinimə sıx-sıx sarıla bilmirəm, Muhamməd sallallahu aleyhi və səlləm kimi hər kəsə qarşı mərhəmətli ola bilmirəm, Amma onların yolunda getmək istəyirəm, ya Rəbb! Ya Rəbb, Səni sevirəm, mən bir qulam, büdrəyən, Günahla zəifləyən, itaətlə güc qazanan bir qulam, Hər dəfə yıxılıb yenə Sənin qapına gələn bir qulam, Məni Öz qapından ayırma, ey mərhəmətli Allah! İbrahim peyğəmbər kimi Sənə tam təvəkkül etməyi nəsib et, Yusuf peyğəmbər kimi nəfsimin qarşısında iffətli olmağı nəsib et, Nuh peyğəmbər kimi uzun səbrlə haqq yolunda dayanmağı nəsib et, Musa peyğəmbər kimi qorxularım qarşısında Sənə güvənməyi nəsib et! Ya Rəbb, Süleyman peyğəmbər kimi nemətlərinə şükür etməyi, İsmayıl peyğəmbər kimi əmrinə könüldən təslim olmağı, Lut peyğəmbər kimi fitnələrdən uzaq durub iffətimi qorumağı, İsa peyğəmbər. kimi dünyaya deyil, Sənə bağlanmağı nəsib et! Ya Allah, Ömər kimi haqq qarşısında ədalətli, Əbu Bəkr kimi sədaqətli və sadiq, Osman kimi həyalı və mərhəmətli, Əli kimi elmə, hikmətə və cəsarətə bağlı bir qul et! Qəlbim bəzən yorular, nəfsim məni yoldan salar, Dünya məni aldadar, günah könlümdə iz salar, Amma Sənin rəhmətin mənə hər dəfə ümid verər, Qapına gələn bu qulunu, ey Rəbbim, geri çevirmə! Mən zəifəm, Sən Qüvvətlisən, mən möhtacam, Sən Qanisən, Mən yolumu itirərəm, Sən yol göstərən Rəbbimsən, Mən özümü tanımaqda acizəm, Sən məni məndən yaxşı bilirsən, Məni nəfsimə buraxma, ey Rəbbim, məni Özünə burax! Çünki mən işləri yoluna qoymağı bacarmaram, Allahım, mənim üçün Sən seç, mənə seçim haqqı vermə, ya Rəbb, Məni Öz istədiyin yola yönəlt, qəlbimi Öz nurunla doldur, Əlimdən tut, məni Özünə yaxın qullarından et... Amin! Ey Allah! Mənə Səni unutmayacağım bir qəlb, Səndən uzaq düşməyəcəyim bir yol, Günah qarşısında dayanacaq bir iradə, Sınaqlar qarşısında sınmayacaq bir iman nəsib et! Gözlərimi haramdan, dilimi yalandan, Qəlbimi kin və həsəddən, əllərimi zülmdən qoru, Hər nəfəsimi Sənin zikrinlə gözəlləşdir, Son nəfəsimi də imanla və Sənin razılığınla tamam et! Ya Rəbb! Məni sevdiklərinlə birlikdə yaşat, Sevdiklərinlə birlikdə dirilt, Sevdiklərinin yolunda sabit saxla, Və məni Sənin razı olduğun bir qul kimi Öz hüzuruna al! Sən mənim Rəbbimsən, Mən Sənin aciz qulunam. Məndən üz çevirmə, Məni Öz rəhmətindən məhrum etmə, Məni Öz qapından ayırma... Ey mərhəmətlilərin ən mərhəmətlisi, Ey qəlbləri çevirən Rəbbim, Ey duaları eşidən Allahım, Məni Özünə yaxın et... Məni Öz nurunla yaşat, Öz mərhəmətinlə bağışla, Öz hidayətinlə sabit saxla, Öz razılığınla yaşat və Öz razılığınla Özünə qaytar... Amin, ya Rəbbəl-aləmin!