Ep 1: 21 વર્ષની ઉંમરે અમેરિકા પહોંચેલો સની પટેલ ગ્રીન કાર્ડ હાથમાં આવે તે પહેલા જ રસ્તા પર આવી ગયો

23 ઓગસ્ટ 1998, અમેરિકાનાં ન્યૂજર્સી સ્ટેટની એક જેલમાં રાતના ત્રણ વાગ્યાની આસપાસ 24 વર્ષનો એક યુવક આંખો બંધ કરીને ચૂપચાપ પોતાની સેલમાં પડ્યો હતો, તેને ઊંઘવા માટે મથી રહ્યો હતો પણ કેટલાક માથાભારે કેદીઓની બૂમાબૂમ જાણે તેના માથા પર હથોડા ઝીંકાઈ રહ્યા હોય તેમ તેને ઊંઘવા નહોતી દઈ રહી. માત્ર કેદીઓના બૂમબરાડા જ નહીં, પણ તે જ દિવસે સવારે બનેલી એક ઘટના બાદ તેને પાંસળીમાં થઈ રહેલી પીડાને કારણે પણ તેનું ઊંઘવું અશક્ય બની રહ્યું હતું. જિંદગીમાં ક્યારેય પોલીસ સ્ટેશનનું પગથીયું ના ચઢનારા તે યુવકને જેલમાં આવ્યે હજુ અઠવાડિયું પણ નહોતું થયું અને જો તેના ખિસ્સામાં કદાચ પૈસા હોત તો તેને જેલમાં જવાનો વારો પણ ના આવ્યો હોત.. જોકે, જે થવાનું હતું તે થઈ ચૂક્યું હતું અને ઘણા મહિનાથી તેને જે વાતની ચિંતા સતાવી રહી હતી તે આખરે સાચી પડી હતી. ન્યૂજર્સીની જેલમાં બંધ તે યુવકનું નામ હતું સની પટેલ, જેને અમેરિકા આવ્યે માંડ ત્રણ વર્ષ થયા હતા. 21 વર્ષની ઉંમરે ભરજવાનીમાં અમેરિકા આવી ગયેલો સની હોશિયાર તો ઘણો હતો, પણ તેના નસીબ એટલા કાઠા હતા કે અમેરિકા આવ્યા બાદ જાણે તેના જીવનમાં એક પછી એક સમસ્યાઓ આવતી જ રહી હતી. એક સમયે ફુટપાથ પર ઊંઘીને દિવસો કાઢનારો સની બે વર્ષ બાદ માંડ સેટલ થઈ રહ્યો હતો પણ ત્યારે જ તેની જિંદગીમાં એક એવી ઘટના બની હતી કે તેને કારણે તેને જેલમાં જવાનો વારો આવ્યો હતો. સનીને એમ હતું કે તે જેલમાં અમુક સમય કાઢી નાખશે ત્યારબાદ તેની લાઈફમાં બીજી કોઈ પ્રોબ્લેમ નહીં રહે, પરંતુ 24 વર્ષના સનીની જિંદગીના સૌથી ભયાનક સમયની તે હજુ શરૂઆત માત્ર જ હતી, 07 જુલાઈ 1997માં બનેલી એક ઘટના કે જેને કારણે સનીને જેલમાં આવવું પડ્યું હતું તે આખી જિંદગી તેને એવી નડવાની હતી કે તેની સામે જેલવાસ તો જાણે કંઈ હતો જ નહીં. જુઓ અમારી વેબસાઈટ: https://www.iamgujarat.com/ વધુ વિડીયો જોવા માટે ક્લિક કરો: https://gujarati.timesxp.com/ IamGujarat સાથે વોટ્સએપ પર જોડાઓ: https://chat.whatsapp.com/Hjwo7YqSPxS...