Niite Nirudi Kwetu | LADHA ZA GHASSANI

Niite Mama Niite, mwanao nirudi kwetu, nishachoka na safari Niite kwetu nifike, kuliko na wetu watu, Niite wako swaghiri Jamaa uwaalike, wajazane ndani mwetu, wanipokee kwa ari Niite nirudi kwetu Mama niite mwanao Ishanichosha safari Mama usiku inuka, umwambie Mola wetu, unamtaka mwanao Mwanao nilokopoka, mwana nilohama Kwetu, hashika njia ambayo Mbali ilonipeleka, kuso langu kuso letu, si kwa ndewe si sikio Niite nirudi kwetu Mama niite mwanao Nishachoka kusafiri Anitwaye anilete, kwa mawimbi ya bahari, na kwa pepo za musimu Chomboni anifumbate, niiandame safari, nirudi kwenye isimu Niite na niitike, na wala nisighairi, na wala nisilaumu Niite nirudi kwetu Mama niite mwanao Nishachoka na safari Nijile miye nijile, hima hima nije Kwetu Nije kwa wangu wavyele, kwa nchi iliyo yetu Nije kwenye mambo tele, yanofanya niwe mtu Nije kwetu miye nije, Apendapo Mola wetu, nije pasina sumile! Niite nirudi kwetu Mama niite mwanao Nishachoka na safari Nije niyaone yote, ya kupwa na ya kujaa Ya Chake Chake na Wete, ya Pandani na Wambaa Nami nionwe na wote, marafiki na jamaa Nije kwetu miye nije, Neema au fadhaa, Ya kwetu ni yetu sote Niite nirudi kwetu Mama niite mwanao Nishachoka na safari Nije na nije kikweli, mwendakwao si mtovu Nije wala nisijali, wapi palipo pabovu Nije na yangu akili, na ilimu na welevu Nije kwetu miye nije, Niwajiao ni wangu, Na miye pia ni wao Niite nirudi kwetu Mama niite mwanao Nishachoka na safari Nije kwenu mama na baba, kwa babu na bibi zangu Nije kunako mahaba, fakhari na gambo langu Ningakumbwa na adhaba, kwavyo huko kuja kwangu Nije kwetu miye nije, Ndio uamuzi wangu, Lolote nitalibeba Niite nirudi kwetu Mama niite mwanao Nishachoka na safari Basi zifise salamu, uwaonapo jamaa Wambe punde utatimu, muda wa kushika njia Na hilo nishaazimu, na nyuma sitarejea Naja kwetu miye naja, Naja hali ‘meridhia, Kuwa na yangu kaumu Niite nirudi kwetu Mama niite mwanao Nishachoka na safari