«Шенеуніктер далада қалдырса, өзімізді өртеуге дайынбыз»

«Шенеуніктер далада қалдырса, өзімізді өртеуге дайынбыз». Үйлерінің сүрілуіне қарсы шыққан алматылықтар осылай деп айқай шығарды. Жұрт жаңа бас жоспарды көріп жағаларын ұстаған. Себебі, әкімдіктегілер “Заря” бау-бақша серіктестігіндегі 365 үйді талқандауды көздеп отыр дейді. Тыныш өмір қалаған тұрғындардың талап-тілегін әріптесім Нұртілеу Жылқышыбай тыңдап келді. Жұрттың бұлай ашуға булығуына себеп бар. Өткен айда түзетілген Бас жоспармен танысқан тұрғындар үйлерінің болашағы қыл үстінде тұрғанын көріп, шошыған. 90-шы жылдардан бері түртілмей тұрған тұрғын үйлерінің талқандалып орнына жол, кешен сынды алып нысандардың салынатынын естідік дейді. ҚАРЛЫҒАШ ШАНШЫҚОВА, Алматы қаласының тұрғыны: Осы Заря минздравта 365 үй. Біздің жеке меншік жерімізді тартып алғай жатыр. Не деген сұмдық? Ондай үкіметтің бізге не керек? Бізді ойламаса, біз де оларды ойламаймыз. Ешкімге бермейміз. Сносқа қарсымыз. Қимастықпен үйінің әр кірпішіне көз тоқтатып, ауласына мұңая қарап отырған Айша апай да ертеңіне алаңдайды. Әкімдікке көнген күннің өзінде, берілетін өтемақының көңіл көншітетініне күмәнмен қарайды. АЙША АЙНАБЕКОВА, Алматы қаласының тұрғыны: Шенеуніктерге айтарым, мысалы менің үйімді алатын болсаң маған тура соған пара-пар үй бер. Сонда әділетті болды. Біз далада қалуымыз керек па сонда жалғыз баспанамызды беріп. Осында тұратынның бәрі жәй халық. Неге жәй халықтың мүддесін, пайдасын үкімет ойламайды? НҰРТІЛЕУ ЖЫЛҚЫШЫБАЙ , тілші: Иә, жаңа бас жоспар қала үшін қажет шығар. Бірақ бұл өзгеріс жүздеген отбасының тағдырын талқыға салмауы тиіс дейді тұрғындар. Болашағына алаңдаған халықтың бір ғана тілегі бар, ол - үйлерін бұзбай, тыныш өмір сүрулеріне мүмкіндік беру. Ал бас жоспарды бекіткен басқарма басты сұрақтарға жауап бермеді. Қашан, қалай деген қарапайым сауалдардың өзіне үн қата алмады. Түйгеніміз тұтас бау-бақша серіктестігі түгел талқандалмайды. Тек, жол салынатын бір бөлігі ғана бұзылуы мүмкін. Ал берілетін өтемақы жер мен үйге бөлек-бөлек, нарықтық бағамен есептеледі дейді шенеунік. Енді оған халық көне ме? Басты сұрақ осы. #Информбюро #31арна #БастыЖаңалықтар #Новости #31канал