منجم السكري.. حقيقة بيع مصر لذهبها.. لماذا لا تنقب مصر عن الذهب بنفسها؟

خلال الشهور اللي فاتت حصلت ضجة كبيرة جدًا حوالين منجم السكري.. اللي اتقال إن مصر باعته بالرغم من إنه بيخرجلها ربح سنوي بيعدي الـ 100 مليون دولار.. وقدرت مصر تربح منه أكتر من مليار دولار من بداية تشغيله في 2009. بس ايه حقيقة الكلام ده؟ هل هي شراكة ولا بيع؟.. وليه مصر مبتنقبش عن الدهب بنفسها؟.. وايه مستقبل الدهب المصري ومين اللي بيخرجه؟.. وخصوصًا إننا شايفين الدهب كل يوم بيعلى ولسة هيعلى كمان وكمان. على بعد حوالي 25 كيلومتر من مدينة مرسى علم المصرية.. وفي قلب الصحراء الشرقية لمصر موجود منجم من أهم مناجم الدهب في العالم.. وهو منجم السكري.. اللي بلغ إنتاجه 5.7 مليون أوقية دهب من بداية تشغيله في 2009 .. بحسب الكلام اللي قاله المهندس كريم بدوي وزير البترول والثروة المعدنية.. وبفضل الإنتاج الضخم ده .. حصلت مصر على أرباح تخطت المليار دولار.. وعلشان كدة منجم السكري بيعتبر عنصر حيوي في الاقتصاد المصري. لإن غير الأرباح اللي مصر حققتها.. احتياطي الدهب في منجم السكري بيقدر بحوالي 15.5 مليون أوقية..يعني حوالي 484 طن من الدهب.. وبيوصل إنتاج المنجم السنوي من الدهب لحوالي 400 ألف أوقية كمتوسط سنوي، بحسب اللي نشرته صحيفة المصري اليوم.. وعلشان كدة السكري بيعتبر واحد من أكبر مناجم الدهب المفتوحة في العالم.. بمساحة تتعدى الـ 160 كيلو متر مربع. تقولي طالما المنجم بالجمال ده كله.. ليه مصر باعته أصلًا؟.. الحقيقة إن مصر مبعتش المنجم ولا حاجة وكل اللي انت سمعته ده عبارة عن معلومات مغلوطة مش أكتر.. وعلشان تفهم أكتر تعالى احكيلك القصة من البداية. صحيح إن المنجم بدأ تشغيله في 2009.. بس تاريخه أقدم من كدة بآلاف السنين.. لإن التنقيب في السكري بدأ في عهد الفراعنة والرومانيين.. وفي 1914 تم استكمال التعدين في المنجم بس بشكل بسيط جدًا. ولكن في الفترة بين 1937 و 1951 اتوسعت عمليات التنقيب في السكري علشان تشمل التنقيب تحت الأرض كمان.. ولكن بسبب صعوبة تشغيله وتكلفة التنقيب العالية والنقص التكنولوجي .. وبالتالي انخفاض الجدوى الاقتصادية من تشغيل المنجم. حصلت محاولات استكشافية كتير بعدين.. أهمها العملية الاستكشافية اللي تمت سنة 1971 بمساعدة الاتحاد السوفيتي وفي 1994 تم توقيع اتفاقية بين هيئة الثروة المعدنية والشركة الفرعونية لمناجم الذهب، اللي استحوذت عليها بعد كدة شركة سنتامين الأسترالية.. بموجب الاتفاقية دي المنجم بيتم إدارته بصورة مشتركة بين مصر وشركة سنتامين.. و بدأت علميات التعدين في سنة 2009.. وبدأ بعدها الإنتاج التجاري في أبريل سنة 2010.. طب ليه مصر لجأت لشركة أصلًا؟. بص.. ده حصل عشان بشكل عام التنقيب عن الدهب في أي حته بيمر بمراحل كتيرة جدا في الأول قبل ما يتم استخراج الدهب.. زي مراحل الاستكشاف في الأول. وبعد كده بيتم عمل دراسة الجدوى للمشروع.. لإن مش شرط إن لو فيه دهب في المنطقة المستكشفة إن تكلفة استخراجه هتكون مربحة زي ما حصل قبل كدة في الخمسينات مع مصر واضطرت توقف التعدين في منجم السكري. ده غير طبعًا بناء المنجم وتجهيز البنية التحتية لغاية مرحلة الإنتاج التجاري.. وكل المراحل ديه خدت 14 سنة لحد سنة 2009.. كانت الاتفاقية بينا وبينهم كالتالي.. هما عليهم التمويل والتنقيب وتنفيذ توسيعات المشروع وبيدفعوا لمصر 3% من إجمالي إيراد المبيعات.. طب هل دي النسبة الوحيدة؟ لأ طبعًا ده يبقى خراب بيوت. بعد كدة بيتم تخريج التكاليف والمصروفات اللي شركة صرفتها على جنب.. وبعدها الأرباح بتكون 50% لكل طرف. الأرباح بدأت فعليًا تتوزع في 2016 وساعتها مصر خدت 18.5 مليون دولار من اقتسام الأرباح.. وخدت 17.3 مليون دولار اللي هم 3% من إجمالي المبيعات، بحسب البيانات اللي نشرتها العربية بيزنس. وفي 2023 وهي آخر سنة لاقتسام الأرباح.. خدت مصر 104 مليون دولار من تقسيم الأرباح بالإضافة لـ 26.3 مليون دولار اللي هم الـ 3% زي ما شرحتلك. ونيجي هنا لأهم نقطة.. هل المنجم اتباع في 2024 فعلًا؟.. لأ خالص. كل اللي حصل إن شركة في شركة تعدين اسمها "انجلو جولد أشانتي".. ودي تعتبر سادس أكبر شركة تعدين على مستوى العالم.. إنها هتستحوذ على كامل أسهم واستثمارات شركة سنتامين الأسترالية في صفقة بقيمة 2.5 مليار دولار.. 1.9 مليار كفلوس.. حوالي 600 مليون هتمتلكهم سنتامين كأسهم. وبحسب تصريحات وزارة البترول.. فالصفقة مش هتأثر على حصة مصر بأي شكل.. وإن اتفاقية 1994 سارية المفعول بالكامل.. يعني كل ما في الأمر إن الشريك اتغير .. بدل ما كنا بنتعامل مع سنتامين.. بقينا نتعامل مع أنجلو جولد. #منجم_السكري يعني مفيش أي ضرر.. بل إن مصر كمان هتخرج مستفيدة من الصفقة دي، بحسب كلام وزير البترول المصري السابق عبدالله غراب في مقابلة ليه مع مع بي بي سي. وده لإن شركة أنجلو جولد هترفع إجمالي الإنتاج السنوي علشان يوصل لأكتر من 3 مليون أونصة.. وبالتالي فانت حصتك السنوي زادت من غير اي مجهود بحسب كلام غراب. ومش دي بس الاستفادة الوحيدة.. الفكرة من الشراكة دي إن مصر معلهاش أي مخاطر استثمارية في المشروع ده.. إزاي ده بيحصل؟ الفكرة هنا إن ممكن الشركة تفضل تنقب عن الذهب وتحفر.. وتعمل بنية تحتية مكلفة جدا زي محطات الطاقة وخطوط الماية.. وبعدين ميطلعش دهب خالص في الآخر!! هنا الخسارة دي كلها بتتحمل على الشركة بس.. ومفيش أي حاجة بتتحمل على الحكومة.. لكن لو الشركة قدرت تطلع دهب.. ففي الحالة ديه بتاخد قيمة التكاليف ديه قبل تقسيم الأرباح مع الحكومة المصرية زي ما قولتلك من شوية. حاجة تانية مهمة.. وهو إن نسبة نقاء الدهب في السكري بتتراوح ما بين 89 % لـ 91%.. بمعدل تركيز 1.27 جرام/طن.. وعلشان كدة فالدهب اللي بيتم استخراجه من المنجم بيحتاج إجراءات صناعية معينة علشان يوصل للمواصفات العالمية المطلوبة. طيب هو المنجم بيطلع دهب قد ايه؟ #الرابط #منجم_السكري #مصر #اسعار_الذهب #اسعار_الدولار