የኅዳር ሚካኤል ዋዜማ

ዋዜማ፦ ሃሌ ሉያ መርሖሙ መዓልተ በደመና ወኵሎ ሌሊተ በብርሃነ እሳት ወአውጽኦሙ ለሕዝቡ በትፍሥሕት ፈነወ መልአኮ ወአድኃኖሙ እንዘ ሚካኤል የሐውር ቅድመ ትዕይንቶሙ ለእስራኤል። ምልጣን፦ እንዘ ሚካኤል የሐውር ቅድመ ትዕይንቶሙ ለእስራኤል። ይትባረክ፦ ለዓለም ወለዓለመ ዓለም ነዋ ሚካኤል መልአክክሙ ይስአል ለክሙ ኀበ እግዚአብሔር ዘልዑለ ይሠርር ለመድኃኒተ ኵሉ ዓለም በክልኤ ክንፍ። ሰላም፦ በ፪ ዳንኤልኒ ይቤ ነዋ ሚካኤል አሐዱ እመላእክት እምቅዱሳን ቀደምት መጽአ ይርድአኒ አጽንዐኒ ወይቤለኒ ኢትፍራህ ብእሴ ፍትወት አንተ ሰላም ለከ ጽናዕ ወተዐገሥ ወእንዘ ይትናገረኒ ጸናዕኩ ወእቤሎ ንግረኒ እስመ አጽናዕከኒ ወይቤለኒ ሶበ ተአምር ዳእሙ ሚካኤል መልአክክሙ