Արեն Մկրտչյանն այցելել է գործարար Աղասի Ձավարյանի կողմից հիմնված ընկույզի ինտենսիվ այգիներ

Լոռու մարզպետ Արեն Մկրտչյանն այցելել է Ալավերդի համայնքի #Այգեհատ բնակավայրում չեխահայ գործարար Աղասի Ձավարյանի կողմից հիմնված ընկույզի ինտենսիվ այգիներ։ Մարզի ղեկավարը ծանոթացել է այստեղ կիրառվող ժամանակակից տեխնոլոգիաներին, առաջիկա ծրագրերին և ընդլայնման հնարավորություններին։ Գործարարը հայրենի Այգեհատում 10 մլն դոլար ներդրում է կատարել այգին հիմնելու և ենթակառուցվածքները բարելավելու նպատակով։ Ընդհանուր 110 հա տարածքում տնկված ընկույզի այգիներում 30.000 ընկույզի տնկի կա։ Այգիներում կառուցվել են նաև 3 ջրամբարներ, որոնք սնուցում են այգին՝ կաթիլային ոռոգման համակարգով։ Այգու մոտակայքում ևս մեկ ջրամբար կառուցել է ՀՀ կառավարությունը՝ 100,000 մետր խորանարդ տարողությամբ։ Այգիների հիմնմամբ բնակավայրում նաև զբաղվածության խնդիր են լուծում։ Մարզի ղեկավարը հույս է հայտնել, որ մոտ ապագայում տնտեսությունն ավելի կհզորանա՝ նպաստելով նաև բնակավայրի զարգացմանը։ Գործարարն առաջիկայում նախատեսում է ընդլայնել այգիների տարածքը և հիմնել ընկույզի վերամշակման գործարան։ Նա պետական աջակցության ծրագրով նաև մոտ 500.000 դոլար արժողությամբ էլեկտրասնուցման համակարգ կստանա։