Қызылордада із-түссіз кеткен 65 жастағы қария бір аптадан бері табылмай жатыр

Қызылорда қаласында із-түссіз кеткен 65 жастағы қария бір аптадан бері табылмай жатыр. Күндіз үйінен шығып, қайта оралмаған ер адам психиатриялық диспансерде есепте тұрады екен. Тіпті ақсақалдың көшеде жалғыз жүргені бірнеше бейнекамераға да түсіпті. Соның өзінде полицияның қалай таппай жатқанына таңбыз дейді туыстары. Қазір зейнеткерді өз күштерімен іздеуге кіріскен жақындары қызметкерлердің әрекетсіздігіне наразы. 65 жастағы Ғани Көшербаев алты күн бұрын күндіз үйінен шығып кеткен. Бірнеше сағаттан соң оралмағанын білген туыстары бірден полицияға хабар берген екен. Өздері де табандарынан тозып қаланы түгел шарлап шыққандарын айтады. Сөйтсе қарияның сол күні жалғыз кетіп бара жатқан сәті бірнеше камераға түсіпті. Мәселен мына жазбада зейнеткердің өз көшесінде жүргені, ал екінші видеода үйінен 4-5 шақырым ұзап кеткені көрінеді. Егде жастағы ер адамның алған бағыты, жүріп өткен уақыты белгілі бола тұра, полиция әлі күнге таба алмай отыр деп ашынады туыстары. СӘБИТ КӨШЕРБАЕВ, Ғани Көшербаевтың Бауыры: Камерада көрініп тұрған адамды табуға болады ғой қалай болғанда да. Қаланың ортасында. Баяу қимылдарына көңілім толмайды. Бір күнге бір мәлімет қана. Жұмыс істеліп жатыр. Бірақ нәтиже жоқ. Ақыл-есінде ауытқуы бар ақсақал інісінің үйінде тұрады. Бауырының айтуынша зейнеткер мүгедек болса да, өз мекен-жайын толық біледі. Оның үстіне бұрын-соңды өздігінен сыртқа шықпайтын дейді. СӘБИТ КӨШЕРБАЕВ, Ғани Көшербаевтың Бауыры: Больницада жатқанда дәрігерлер күлетін менің көшем Ермақашевта мен үйіме барам деп айтады деп. Ермақашев көшесінде тұратынын біледі. Енді осы кешегі суықтан есеңгіреп айта алмай қалмаса, сөйлейді бәрін біледі. Ал полиция департаментінің өкілдері Ғани Көшербаевты іздеу жұмыстары жалғасып жатқанын жеткізді. Қарияның туыстары құзырлы органдағылар іздеу жұмыстарына салғарт қарап отыр деп есептейді. Ал үйінен шығып кеткенде 65 жастағы азаматтың үстінде қара-көк түсті жемпір, көк түсті шалбар, аяғында жеңіл сүйретпе болған екен. #Информбюро #31арна #БастыЖаңалықтар #Новости #31канал