Masallıda çamışçılıq təsərrüfatı dövlət dəstəyi ilə inkişaf etdirilir

Bir vaxtlar Cənub bölgəsində camışçılıq sıradan çıxmaq üzrə idisə son zamanlar bu sahə dirçəlməkdədir. Xüsusilə Masallı rayonunda bu sahənin inkişaf etdirilməsi baxımından şərait olduğu üçün fermerlər camışçılıq təsərrüfatlarını genişləndirməkdədirlər. Fermer Mikayıl Həsənov uzun illərdir camışçılıqla məşğuldur. Əvvəllər bir neçə baş heyvanı olan fermerin indi böyük bir camışçılıq təsərrüfatı var. Təsərrüfat sahibi deyir ki, Masallıda bu sahəni inkişaf etdirmək üçün münbit şərait var. Su hövzələri və qamışlıq ərazilər kifayət qədərdir. Camışçılıq təsərrüfatları üçün həm də yaxşı atın olması da şərtdir. Çünki camışın girdiyi bataqlıq və qamışlıqdan onu çıxarıb gətirmək üçün at mühüm vasitə hesab olunur. Tələbata gəldikdə isə fermerlərin bundan gileyi yoxdur. Onlar bu sahəni sərfəli hesab edirlər. Fermer Mikayıl Həsənov bildirdi ki,qidalılığı daha yüksək olduğu üçün camışın əti, südü, pendiri və qatığının satışında heç bir çətinlik yaşanmır: “3 ilə kimi heyvanın ətin satırıq. Pendirin 1 kiloqramın 2 manat 50 qəpikdən Bakıdan gəlib aparırlar. Südün də 1 litrin 1 manat 10 qəpiyə satırıq.” Üstəlik camışçılıq təsərrüfatları mal-qaraya nistəbən daha az xərc tələb edir. Camış gününün çoxunu su hövzələrində və qamışlıqda keçirdiyi üçün orada da qidalanır. Camış həm də xəstəliyə daha davamlıdır: Mirzəağa Süleymanov – baytar həkim:“Camışın mal-qaradan fərqi odur ki, qan parazital xəstəliklərə yoluxmur. Bir dənə pesteliyoz xəstəliyi var – el arasında ona “xortlama” deyirlər. Ona qarşı peyvənd etdikdən sonra xəstəliyə də yoluxmur.” Bu səbəbdən fermer Mikayl Həsənov təsərrüfatını daha da genişləndirməkdədir. Bu məqsədlə o bir müddət əvvəl dövlətin yaratdığı şəraitdən yararlanaraq güzəştli kredit alıb və heyvanların sayını bir qədər də artırıb.