සක්දෙවිඳුන් සහ සුජාතාවන් අතර පවත්නා සසර බැඳීම සහ සුජාතාවන්ගේ ආධ්‍යාත්මික ගමන...

සක්දෙවිඳුන්ගේ අග්‍ර බිරින්දෑවරුන් සතර දෙනා අතරින් සුජාතාවන්ට සක්දෙවිඳුන් දක්වන්නේ විශේෂ වූ ඇල්මකි. ඔහු පින් දහම් සිදුකරගැනීමට මනුෂ්‍ය ලෝකයට වඩින සෑම අවස්ථාවකම සුජාතාවන් ද කැටුව එන බැවින් සහ ඇය කෙරෙහි වූ ඒ අපූර්ව ගනුදෙනුව නිසාම සක්දෙවිඳුන් "සුජම්පතී" හෙවත් සුජාතාවන්ගේ ස්වාමියා යන නාමයෙන් ද ප්‍රකට විය. මෙම සබඳතාවයේ ආරම්භය බොහෝ දුර අතීතයට දිව යන්නකි. දඹදිව මචල නම් ගමේ මඝ නම් තරුණයා ලෙස ඉපදී සිටි කාලයේදී ද සුජාතා ඔහුට බිරියව සිටියාය. එකල මඝ මානවකයා සහ ඔහුගේ මිතුරන් තිස්දෙනා එක්ව ගමෙහි මහත් වූ පින්කම් රැසක් සිදුකළ අතර, ඉන් පසුව ඔවුහු තව්තිසා දෙව්ලොව උපත ලැබූහ. ඒ පින්කම්වල ප්‍රතිඵලයක් ලෙස මඝ මානවකයා සක්දෙවිඳුන් වූ අතර, සෙසු මිතුරන් තිස්දෙනාද දෙව්ලොව පහළ විය. ශාලාවක් ඉදි කිරීමේ පින්කමේදී මඝ තරුණයා සමඟ එකතු නොවූ සුධර්මා, චිත්‍රා සහ නන්දා යන බිරින්දෑවරුන් තිදෙනා, රහසින් වුවද එම කාර්යයට දායක වී විවිධ පින්කම් සිදුකර ගත්හ. කැණිමඬලක් ලබා දුන් සුධර්මා සක්දෙවිඳුන්ගේ සුධර්මා දෙව්සභාව ද, උයනක් සැකසූ චිත්‍රා චිත්‍රලතා උද්‍යානය ද, පොකුණක් කරවූ නන්දා නන්දා පොකුණ ද සහිතව දේවත්වයට පත් වූහ. එහෙත් සුජාතාවන් කිසිදු පිනක් කර නොගැනීම හේතුවෙන් ඇය මියගොස් වනාන්තරයක දිය ඇල්ලක් අසල කෙකිණියකව උපත ලැබුවාය. ඇයගේ පිහිටට පැමිණි සක්දෙවිඳුන් ඇයව දෙව්ලොවට ගෙන ගොස් සෙසු දේවතාවියන්ගේ සැප සම්පත් පෙන්වා, කුසල් රැස් කරගැනීමේ වැදගත්කම අවබෝධ කර දුන්නේය. සක්දෙවිඳුන් පරීක්ෂා කිරීමේදී ඇය සිල්වත් බව තහවුරු වූ අතර, පසුව ඇය මනුෂ්‍ය ලෝකයේ වළං සාදන්නෙකුගේ නිවසේ උපත ලැබුවාය. සක්දෙවිඳුන් නැවත වරක් වයෝවෘද්ධ පුද්ගලයෙකුගේ වෙස් ගෙන රන් කැකිරි රැගෙන විත්, සිල්වත් තැනැත්තියකට පමණක් ඒවා ලබා දෙන බව ප්‍රකාශ කළේය. සත්‍ය වශයෙන්ම සිල් රකින සුජාතාවන් එම රන් කැකිරි ලබාගෙන දියුණුවට පත්වී මනුෂ්‍ය ලෝකයේ බොහෝ කුසල් රැස් කරගත්තාය. මරණින් මතු වේපචිත්ති අසුරේන්ද්‍රයාගේ දියණිය ලෙස උපන් සුජාතාවන් සඳහා පැවැත්වුණු ස්වයංවර මංගල්‍යයේදී, නැවත වරක් වයෝවෘද්ධ අසුර වේශයෙන් එහි පැමිණි සක්දෙවිඳුන්ව ඇය හඳුනාගෙන මල් මාලය පළඳවා තමාගේ සහකරු ලෙස තෝරා ගත්තාය. සක්දෙවිඳුන් ඇයව වහාම තව්තිසාවට රැගෙන ගොස් දිව්‍යාංගනාවන් අතර අග්‍ර තනතුර ලබා දුන්නේය. සැබෑ ප්‍රේමය යනු මනුෂ්‍යයෙකු තවකෙකුගේ සසර ගමනට සහය වෙමින්, ඔහුව දුකින් නිදහස් වීමේ මඟට යොමු කිරීම බවත්, සක්දෙවිඳුන් ආත්ම තුනක් පුරා ඇයව රැක බලා ගනිමින් සසරින් නිදහස් වීමට මඟ පෙන්වූ අයුරුත් මෙයින් පැහැදිලි වේ... උතුම් තෙරුවන් සරණයි... නමෝ බුද්ධාය...