សូមអនុមោទនា វេរភត្ត និងរាប់បាត្របញ្ចប់វេនកាន់បិណ្ឌទី១៤

សូមអនុមោទនា វេរភត្ត និងរាប់បាត្របញ្ចប់វេនកាន់បិណ្ឌទី១៤ ━━━━━━━━━━━━━━━ នាព្រឹកថ្ងៃសៅរ៍ ១៤រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១០ ខែតុលា ឆ្នាំ២០២៦នេះ៖ អគ្គមហាឧបាសិកាពុទ្ធសាសនូបត្ថម្ភក៍ សុខ អ៊ីម ព្រមទាំងបុត្រ និងចៅ ក្រុមញាតិ មហាឧបាសកពុទ្ធសាសនូបត្ថម្ភក៍ លី យ៉ុង មហាឧបាសកពុទ្ធសាសនូបត្ថម្ភក៍ អ៊ុង សុផល ព្រមទាំងបុត្រ លោក លី ឈាងម៉េង អ្នកស្រី លី សុភី ព្រមទាំងបុត្រ លោក ប៊ូ ហ៊ុយ អ្នកស្រី លី សុភាព ព្រមទាំងបុត្រ លោក លី សុម៉េត អ្នកស្រី អាយ លីន ព្រមទាំងបុត្រ លោក​ ហុង​ គង់​ លោកស្រី​ លី​ ដា​ ព្រមទាំង​បុត្រ រួមជាមួយមហាឧបាសក មហាឧបាសិកា ឯកឧត្តម អ្នកឧកញ៉ា លោកឧកញ៉ា លោកជំទាវ លោក លោកស្រី ឧបាសក ឧបាសិកា និងពុទ្ធបរិស័ទជាច្រើនរូប ក៏បាននិមន្ត-អញ្ជើញចូលរួមវេនកាន់បិណ្ឌទី១៤នេះជារៀងរាល់ឆ្នាំ បានរៀបចំចាត់ចែងភោជនាហារ ចង្ហាន់បិណ្ឌបាត ទេយ្យទានដ៏ប្រណីត វេរភត្តដារឆ្លង និងរាប់បាត្រ ព្រមទាំងបានទុកដាក់បច្ច័យ ៤ ប្រគេនព្រះសង្ឃប្រើប្រាស់តាមពុទ្ធវិន័យ និងជូនសីលវន្ត-សីលវតីផងដែរ សង្ឃម្ហិ សុបតិដ្ឋិតា ទានដែលតម្កល់នៅល្អហើយក្នុងសង្ឃ ទីឃរត្ដំ ហិតាយស្ស ឋានសោ ឧបកប្បតិ ទក្ខិណាទាននោះ ទើបចូល ទៅសម្រេចតាមស្ថាន ដើម្បីជាប្រយោជន៍ដល់បុព្វការីនោះ អស់កាលជាយូរអង្វែង ប្រកបដោយចេតនាជ្រះថ្លារីករាយក្នុងបុណ្យកុសលដ៏ក្រៃលែង ។ ចេតនា ដែលនាំឱ្យកើតបុណ្យ ជាប្រធាន ឬប្រភពនាំឱ្យកើតបុណ្យ ដោយសេចក្តីជ្រះថ្លា សប្បាយរីករាយ ពេញចិត្តក្នុងទង្វើល្អផ្សេងៗ ។ ចេតនា ដែលនាំឱ្យសម្រេចផលបុណ្យកុសល៣ ប្រការ៖ បុព្វចេតនា ចេតនាមុនធ្វើ គឺការតាំងចិត្ត និងរៀបចំទុកជាមុន ដោយចិត្តជ្រះថ្លា មុញ្ចនចេតនា ចេតនាកំពុងធ្វើ គឺការខ្នះខ្នែង ចាត់ចែង និងប្រព្រឹត្តសកម្មភាពដោយចិត្តជ្រះថ្លា បរាបរចេតនា ចេតនាក្រោយធ្វើ និងបន្តបន្ទាប់ គឺនៅពេលធ្វើរួចមានចិត្តរីករាយ ពេញចិត្ត មិនក្តៅក្រហាយ ឬស្តាយក្រោយ ហើយនៅតែជ្រះថ្លាជានិច្ច។ ចេតនាទាំង ៣ នេះជាប្រភព ឬប្រធាននាំឱ្យកើតបុណ្យកុសលដ៏ក្រៃលែង ដើម្បីឧទ្ទិសមហាកុសលផលបុណ្យ ដែលកើតពីធម្មទាន និងអាមិសទាន ប្រគេន-ជូនចំពោះ បុព្វការីជន ព្រមទាំងញាតិកា ៧ សន្តាន សូមបានទៅកាន់សុគតិភព។ ដោយបុញ្ញានុភាព នៃធម្មទាន និងអាមិសទាន ដែលអគ្គមហាឧបាសិកា ព្រមទាំងបុត្រ និងចៅ រួមជាមួយញាតិញោម មហាឧបាសក មហាឧបាសិកា ឯកឧត្តម អ្នកឧកញ៉ា លោកឧកញ៉ា លោកជំទាវ លោក លោកស្រី ឧបាសក ឧបាសិកា ដែលបាននិមន្ត-អញ្ជើញចូលរួមកាន់វេនបិណ្ឌនាឱកាសនេះ សូមមានសុខភាពល្អ សមប្រកបដោយពុទ្ធពរទាំងឡាយ ៤ ប្រការគឺ៖ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។