అల్లవాడె భావించరె /ALLAVADE BHAVINCHARE / AAV 10 EP 961 / G MADHUSUDANA RAO/NITYASANTOSHINI/BILAHARI

SRIVARI ABHISHEKA VAIBHAVAM EP - 45 ANNAMAYYA AKSHARA VEDAM EP – 961 🌺🍃 -----------🍃🌺 తాళ్లపాక అన్నమాచార్య శృంగార సంకీర్తన ( అల్లవాడె భావించరె అంగన లిందరు గూడి.. ) రేకు రాగము :- పాడి రేకు: 0960-3 సంపుటము: 19-345 స్వరకర్త:- శ్రీ గురజాడ మధుసూదన రావు గారు రాగం :-- బిలహరి గానం:- శ్రీ గురజాడ మధుసూదన రావు గారు మరియూ శ్రీమతి నిత్యసంతోషిణి గారు 🌺🍃 -----------🍃🌺 🌹🌹 సంకీర్తన 🌹🌹 ॥పల్లవి॥ అల్లవాఁడె భావించరె అంగన లిందరుఁ గూడి వుల్లములో తనమాయ లుబ్బెనో శ్రీహరికి ॥చ1॥ నేలా మిన్నుఁ గొలవఁగ మిన్నేటినురుగు ఆలరి యీహరిమేన నంటుకొనెనో పాలవెల్లి తచ్చఁబోఁగాఁ బైఁబడెనో తుంపురులు మేలిమి కప్పురకాపు మెత్తిరో యీహరికి ॥చ2॥ చిత్తగించి రేపల్లెఁ జీఁకటితప్పు సేయఁగా అత్తల చీఁకటినలు పంటుకొనెనేమో వొత్తి కరిఁ గావబోఁగా నొలికెనో పై మదము మొత్తమిఁ బుళుగుకాపు ముంచిరో శ్రీహరికి ॥చ3॥ అలమేలుమంగఁ దెచ్చి అఱుతఁ గట్టుకొనఁగా పొలసి నవరసాలుఁ బొడచూపెనో నెలవైన సొమ్ములెల్లా నిండుకొనె మేననెల్లా అలరి శ్రీ వేంకటాద్రి నందమైనహరికి 🌺🍃 -----------🍃🌺 అన్నమయ్య అక్షరవేదం సంపుటి – 961 ( అల్లవాడె భావించరె అంగన లిందరు గూడి .. ) 🌺🍃 ----------- 🍃🌺 ప్రార్థన :- అల్లదిగో చూడరె హరి యుల్లమునందు సిరినిల్చె నొప్పుగ పన్నీ- రెల్ల దిగువాఱగ ప్రభలు వెల్లివిరాయెనిదె నేడు వేంకటపతిపై ! ✍️ --స్వీయపద్యము ( కందము) 🌹🌹 "ఓ భక్తులారా! అదిగో అక్కడ చూడండి! శుక్రవారం నాటి పవిత్ర అభిషేక సమయంలో ఆ వేంకటేశ్వర స్వామివారి దివ్య మంగళ రూపాన్ని దర్శించండి. స్వామివారి శిరస్సుపై నుండి పన్నీరు మరియు సుగంధ జలాలు ధారలుగా క్రిందికి జారుతుండగా, ఆ సమయంలో శ్రీహరి హృదయ స్థానంలో కొలువై ఉన్న లక్ష్మీదేవి (సిరి) మరింత ప్రకాశిస్తూ, ఎంతో వైభవంగా కనిపిస్తోంది." అందువల్లనే స్వామి మేనిపై అద్భుతమైన కాంతులు వెల్లువలా విరాజిల్లుతున్నాయి. 🙏 🌹🙏 🌹 🌺🍃 -----------🍃🌺 మున్నుడి 🌹 ఇది తాళ్ళపాక అన్నమాచార్యుల వారు స్వామివారి అభిషేక సేవ సమయంలో ఆయన దివ్య మంగళ స్వరూపాన్ని వర్ణిస్తూ రచించిన ఒక శృంగార సంకీర్తన. ఈ కీర్తనలో ఒక గోపికల (స్త్రీల) సమూహం శ్రీహరిని (శ్రీ వేంకటేశ్వరుడిని) చూస్తూ, ఆయన అద్భుతమైన రూపాన్ని గురించిన ముచ్చట్లు, ఆశ్చర్యాలు వారిలో వారు వ్యక్తపరుస్తూ ఉంటారు. లీలా మానుష విగ్రహుడైన ఆ స్వామి, అలమేలుమంగతో కూడి ఉన్న సమయాన ఆయన శరీరం ఈ విధంగా ఎందుకు భాసిల్లుతోందో అని వారు రకరకాలుగా ఊహిస్తారు. అన్నమయ్య ఎంతో అద్భుతంగా శృంగార రసాన్ని జోడించి, శ్రీ వేంకటేశ్వరుని అలంకార సేవను ఇక్కడ వర్ణించారు. స్వామివారికి మెత్తే తెల్లటి కర్పూరం (కప్పురం), నల్లటి పునుగు చందనాలను గోపికలు తమ కల్పనతో ఆయన పురాణ గాథలకు మరియు అలమేలుమంగతో ఆయన కూడికకు చిహ్నాలుగా భావిస్తారు మరి చక్కని ఈ కీర్తన అర్థము తెలుసుకుని పాడుకుండామా ! 🌹🙏🌹 🌹🌹 "ఓ సతులారా! అటు చూడండి, మనమందరం కలిసి ఆయనను వీక్షిద్దాం. ఈ రోజు ఈ శ్రీహరి హృదయం ఎన్నో వింతలైన, మాయలైన లీలా వినోదాలతో ఉప్పొంగిపోతోంది." 🌹🌹 ఆ స్త్రీలు స్వామివారి నల్లని మేనిపై ఉన్న తెల్లటి పూతను లేదా ఆ దివ్య కాంతిని (నిజానికి ఇది అభిషేకం తర్వాత దట్టంగా అలదిన పరిమళ భరిత పచ్చకర్పూర కాపు) చూసి, ఇలా ఊహిస్తారు: • "త్రివిక్రమ రూపంలో ఆకాశాన్ని కొలిచేందుకు ఆయన పాదం పైకెత్తినప్పుడు, ఆకాశ గంగలోని నురుగు ఏమైనా స్వామికి అంటుకుందా?" • "లేక క్షీరసాగర మథనం జరుగుతున్నప్పుడు ఆ పాలసముద్రపు చినుకులు ఆయనపై పడ్డాయా?" • "లేక ఎవరైనా ఈ హరికి చల్లని, సువాసనల తెల్లటి కర్పూరాన్ని ఇలా దట్టంగా పూశారా?" 🌹🌹 ఆపై, స్వామివారి శరీరంపై ఉన్న నల్లని, సుగంధ భరితమైన గుర్తులను లేదా ఆ దట్టమైన నల్లని కాంతిని (నిజానికి ఇది పునుగు అనే పరిమళ ద్రవ్యం) చూసి, వారు చమత్కారంగా ఇలా అనుకుంటారు: • "రేపల్లెలో రాత్రివేళల ఎవరికీ తెలియకుండా రహస్యంగా తిరుగుతూ అల్లరి పనులు చేస్తున్నప్పుడు, ఆ చీకటి స్వామికి అంటుకుందా?" • "లేక మదగజాన్ని (గజేంద్రుడిని రక్షించడానికి వెళ్ళినప్పుడు) ఎదుర్కొని అణచినప్పుడు, ఆ ఏనుగు మదజలం ఆయనపై చిందిందా?" • "లేక శ్రీహరికి కస్తూరి వంటి నల్లని, సువాసనల పునుగు జవ్వాజిని దట్టంగా అలదారా పైన?" 🌹🌹 చివరకు, ఆయన అత్యంత మనోహరంగా, నలుపు-తెలుపుల సమ్మేళనంతో సుగంధభరితంగా ప్రకాశిస్తున్న అసలైన రహస్యాన్ని వారు కనుగొంటారు: • "ఆహా! చూడండి, ఆయన తన వక్షఃస్థలంపై నిరంతరం కొలువై ఉండే అలమేలుమంగమ్మను లాలించి హృదయానికి హత్తుకోవడం వల్లే, ఆ నవ రసాల ప్రేమ మరియు ఆనందం ఆయన దేహంపై ఈ విధంగా దివ్యకాంతులుగా విరజిల్లుతున్నాయి!" ఆ వేంకటాద్రి (తిరుమల) పై కొలువై ఉన్న పరమ సుందరుడైన శ్రీహరి దివ్యమంగళ స్వరూపానికి ఆయన దివ్యాభరణాలు మరియు ఈ పవిత్రమైన కర్పూర-పునుగు పూతలు అదనపు శోభను చేకూరుస్తూ నయనానందకరంగా శోభిల్లుతున్నాయి. 🌹🙏🌹 ఓమ్ శ్రీ అలమేలుమంగా సమేత శ్రీ వేంకటేశ్వర స్వామినే నమః !🙏 తాత్పర్య సహిత దృశ్య మాలికగా మీకు అందించాలన్న నా చిన్న ప్రయత్నమును ఆశీర్వదిస్తారని ఆశిస్తూ..🙏 దోషములున్న...మన్నించమని విన్నపము... 🙏 ✍️ -- వేణుగోపాల్ యెల్లేపెద్ది 🙏 #అల్లవాడెభావించరె #ALLAVADEBHAVINCHARE #GMADHUSUDANARAO #NITYASANTOSHINI #srivariabhishekam #abhishekam #annamacharya #annamacharyakeerthanalu #annamayya #annamayyasongs #అన్నమయ్య #అన్నమాచార్య #annamayyakeerthanalu #annamayyakeerthana #annamayyaaksharavedam