Арманнан аренаға: AICHI–NAGOYA 2026

Рубрикамыздың кезекті кейіпкері — Мұқан Айтмырзаев, пара жеңіл атлетикадан Қазақстан Республикасының спорт шебері, ұлттық құрама спортшысы. Мұқан жастайынан спортқа жақын болып, спортты өмірінің ажырамас бөлігіне айналдырған. Пара спортқа келгенге дейін құқық қорғау саласында қызмет атқарған. Қызмет барысында ауыр жарақат алғанына қарамастан, ол өмірдегі қиындықтарға мойымай, белсенді өмір салтын жалғастырып, пара спортқа қадам басты. Пара жеңіл атлетикамен айналысқанына небәрі төрт жыл болса да, осы уақыт ішінде Қазақстан чемпионы атанып, халықаралық жарыстарда жүлдеге ие болды. Бүгінде спортшы ядро итеру және найза лақтыру дисциплиналарында өнер көрсетеді. Қазір Мұқан AICHI–NAGOYA 2026 Азия Пара ойындарына қызу дайындалып жатыр. Алдағы додаға үлкен мақсат қойып, Қазақстан қоржынына жүлде салуды көздейді.