Die see en emosies

🌊 Emosies het die vermoë om ons lewens deurmekaar te krap. Dit is werklik, maar dit hoef nie jou lewe omver te gooi nie. Vir ’n paar dae het die wind in Jongensfontein erg gewaai en die see was woes. Dit is verstaanbaar — die wind het immers behoorlik gewaai! 💨 Net so gebeur daar soms dinge buite ons beheer wat ons seermaak en selfs traumaties kan wees. Wanneer die lewenswinde waai, word ons gedagtes en emosies maklik deurmekaargekrap. Dan is dit belangrik om nie teen ons emosies te baklei nie. Net soos ek nie die wind kan kalmeer nie, kan ek ook nie altyd my gevoelens onmiddellik verander nie. 🙏 Soek skuiling by die Here en wag geduldig totdat die storm bedaar. In Psalm 131 sê koning Dawid dat hy hom nie meer besig hou met groot dinge of met dinge bo sy vermoë nie. Hy het rus en kalmte gevind, soos ’n kindjie wat tevrede by sy moeder rus. Daarna volg die uitnodiging: “Wag op die Here.” ’n Paar dae later was die water stil, helder en besonder aanloklik. Mense het geswem, visgevang, langs die see gebraai en lekker gespeel. ☀️ Wanneer jou emosies stil en rustig is, is dit tyd om die Here daarvoor te dank en daardie rus te geniet. Die volgende dag was die see weer onstuimig. Daar was geen wind nie, maar die water was vol wit skuim en heeltemal omgekrap. Ons ervaar soms dieselfde soort onverklaarbare onrustigheid in ons eie lewens. Soos die spreekwoord lui: Jy het met die verkeerde voet uit die bed opgestaan. 💛 Dan is dit belangrik om geduldig en genadig teenoor jouself te wees. Erken die emosie, sonder om daardeur beheer te word, en gee dit tyd om te bedaar. In Matteus 11:28–29 nooi Jesus ons om na Hom toe te kom wanneer ons moeg en oorlaai voel, sodat Hy vir ons rus kan gee. Hy nooi ons om van sy sagmoedigheid en nederigheid te leer, sodat ons by Hom ware rus kan vind. ✝️ 🌿 Emosies is werklik, maar dit hoef nie jou lewe omver te gooi nie.