លោកឧត្តមសេនីយ៍ទោ ហេង សុផល ដឹកនាំកងកម្លាំងចូលរួមរំលែកទុក្ខជាមួយក្រុមគ្រួសារសពមន្ត្រី, 113-190926

លោកឧត្តមសេនីយ៍ទោ ហេង សុផល ដឹកនាំកងកម្លាំង ចូលរួមរំលែកទុក្ខជាមួយក្រុមគ្រួសារសពមន្ត្រីនគរបាលជាតិ នៃស្នងការដ្ឋាននគរបាលខេត្តកំពង់ធំ (កំពង់ធំ)៖ ព្រឹកថ្ងៃ ទី ១៧ ខែ កញ្ញា ឆ្នាំ២០២៦ លោកឧត្តមសេនីយ៍ទោ ហេង សុផល ស្នងការនគរបាលខេត្ត ដឹកនាំកងកម្លាំងគោរពវិញ្ញាណក្ខន្ធ និងបំពាក់ឋានន្តរសក្តិ ថ្នាក់វរសេនីយ៍ត្រី ជូនសពមន្ត្រីនគរបាលជាតិ ជាកិច្ចបច្ឆាមរណៈ ស្ថិតនៅ គេហដ្ឋានសពក្នុងភូមិអាចារ្យលាក់ សង្កាត់អាចារ្យលាក់ ក្រុង ស្ទឹងសែន ខេត្តកំពង់ធំ ។ ស្ថិតក្នុងពេលវេលាដ៏សែនក្រៀមក្រំនេះ លោកឧត្តមសេនីយ៍ទោ ហេង សុផល បានថ្លែងថា ក្នុងនាមថ្នាក់ដឹកនាំ ព្រមទាំងមន្ត្រីនគរបាលជាតិ នៃស្នងការដ្ឋាននគរបាលខេត្តកំពង់ធំ ទាំងអស់ សូមចូលរួមរំលែកទុក្ខយ៉ាងក្រៀមក្រំ ចំពោះមរណភាពរបស់ លោកអនុសេនីយ៏ឯក អៀង អ៊ុន នាយផ្នែក ចំណុះការិយាល័យអន្តរាគមន៍ និងតម្រួតបទបញ្ហា ដែលត្រូវជាឪពុកបង្កើតរបស់លោកស្រី អ៊ុន តុលា បានទទួលមរណភាព នៅថ្ងៃពុធ ៥កើត ខែភទ្របទ ឆ្នាំមមី អដ្ឋស័ក ព.ស.២៥៧០ត្រូវនឹងថ្ងៃទី១៦ ខែកញ្ញា ឆ្នាំ២០២៦ វេលា ម៉ោង៩ និង៣០នាទីព្រឹក ក្នុងអាយុ ៥៣ ឆ្នាំ ដោយរោគាពាធ (ជំងឺគាំងបេះដូង)។ ក្នុងពិធីនោះដែរ លោកស្នងការ បន្ដមានប្រសាសន៍ថា មរណភាពរបស់ លោកអនុសេនីយ៍ឯក អៀង អ៊ុន គឺជាការបាត់បង់នូវ ស្វាមី ឪពុក ឪពុកក្មេក ជីតា ជាទីស្រលាញ់ចំពោះបុត្រធីតា និងចៅៗ ប្រកបដោយព្រហ្មវិហារធម៌ មានចរិតស្លូតបូតសុភាពរាបសារ ក៏ដូចជាការបាត់បង់នូវមន្ត្រីនគរបាលជាតិដ៏អង់អាចក្លាហាន ដែលជានិច្ច កាលបានលះបង់ពេលវេលា កម្លាំងកាយចិត្ត និងសេចក្តីសុខផ្ទាល់ខ្លួន រហូតលះបង់អាយុជីវិតប្រកបដោយកិត្តិយស ដើម្បីបុព្វហេតុសន្តិសុខ សណ្តាប់ធ្នាប់ សាធារណៈ និងសុវត្ថិភាពសង្គម។ ជាកិច្ចចុងក្រោយ លោកស្នងការ ព្រមទាំងកងកម្លាំងទាំងអស់ សូមលំឱនកាយចូលរួមរំលែកទុក្ខដ៏ក្រៀមក្រំបំផុតនេះ ជាមួយគ្រួសារ ញាតិមិត្តនៃសព សូមឧទ្ទិសដល់ដួងវិញ្ញាណក្ខន្ធ លោកអនុសេនីយ៏ឯក អៀង អ៊ុន បានសោយសុខក្នុងសុគតិភពតាមបំណងប្រាថ្នាកុំបីឃ្លៀងឃ្លាតឡើយ។ សូមបញ្ជាក់ថា ក្នុងពិធីនោះ លោកឧត្តមសេនីយ៍ទោ ហេង សុផល បានឧបត្ថម្ភ .គ្រឿងឧបភោគបរិភោគ និងសម្ភារៈមួយចំនួន ស្មើនឹង១,៥០០,០០០រៀល,.ថវិកាមិត្តជួយមិត្តចំនួន ១,៥០០,០០០រៀល និងប្រគល់ថវិកាសមាគម មិត្តនគរបាលជាតិកម្ពុជា ៦,០០០,០០០រៀល សរុបថវិកា ៩,០០០,០០០រៀល ជូនក្រុមគ្រួសារសព សម្រាប់ចូលរួមចំណាយដោះស្រាយក្នុងពិធីបុណ្យ ៕