الحلقة الثالثة - تأملات في اللين، وغلظة القلب

اللافت إن الدعوة للين القلب والرحمة خيط مشترك في أغلب النصوص الدينية. ولو حد بذل مجهود بسيط، هيلاقي نصوص متشابهة في كل المعتقدات ، كلها بتدور حوالين نفس المعنى. والخلاصة إن ده شبه قانون عام: أي دين أو توجه أخلاقي عايز يجذب الناس ويجمعهم ويعيش ويترك أثر طيب، لازم يكون متسق مع تركيبة الإنسان وفطرته. عكس اللين: الفظاظة، وهي بلغتنا، هي قلة الأدب - الجلفنة والوقاحة والسفالة… واللي مش هاقول بقت غالبة، لكنها للأسف كترت وانتشرت بفضل وسائل التواصل. وبقت بتناقض أبسط قواعد التعامل الإنساني بين البني آدمين. الفظاظة فعل محتاج طرفين: فظ ومفظوظ عليه. ومع فظاظة الطرفين، بتتحول بسهولة لفظاظة متبادلة، بين اتنين، أو مجموعتين، وأحيانًا حتى بين بلدين. الرسول والرسل، وبعدهم الصالحون والعلماء بجد، مش النسخ الكرتونية من نوعية "أسد الوغى، سيد أبزيمة" بكل ما ملكوه من سلطة، ربنا سبحانه و تعالى وضع لهم قاعدة راسخة في الآية دي، وهي إن بكل هذه السلطة، لو لم تنلك رحمةمن الله يصيبك بها لين قلب، ولو سيطرت عليك فظاظة أتت من غلظة قلبك سينفض البشر الطبيعيون من حولك. ببساطة: لو كنت وقِح، جلف، قليل الأدب وقاسي القلب، الناس الطبيعية عمرها ما هتتجمع حواليك، وهتنفِر منك.