Алматы облысы Қосөзен ауылында қанды атыс орын алды

Алматы облысында бір топ адамға оқ жаудырған әкесі мен ұлы ұсталды. Куәгерлердің айтуынша, жолдағы жанжалдан кейін екеуі үйінен қару алып шығып, жиналған жұртқа кезенген. Салдарынан, үш адам жараланыпты. Осы қақтығыстан кейін Қосөзен ауылының халқы өре түрегеліп, шатақ шығарған отбасын көшіруді талап етіп отыр. Атыс болған ауылға әріптесім Нұртілеу Жылқышыбай барып қайтты. Оқтың ізі темірде, үрейдің табы тұрғындардың тұла бойында. Өткен түн қосөзендіктердің тыныштығын бұзды. ЕРКЕБҰЛАН САДЫҚОВ , Қосөзен ауылының тұрғыны: Кеше кешкісін таксовкадан келе жатып, мына көшемен төмен түсіп бара жатқанмын. Встречкаға маған шықты. Обочинаға шығып өткізіп жібердім оларды мен. Сөйтіп, айналып келді да артымнан, машинасымен түсе салып ұрды сразу. Папасы бүйтіп құшақтап алды, екі баласы екі жақтан ұрды. Бұл кісілер сигнал басып еді. Анау машинаға отырды да қашты. Қуалап келіп едім мына жаққа, мені атып ұрды дубинкамен. Нөмірсіз. ішіп алған мас. Еще жас бала болды за рулем. Айқай-шуды естіген ауыл тұрғындары үйдің алдына жиналған екен. Алайда жанжалды басуға келген жұрттың өзі оқтың астында қалыпты. НҰРТІЛЕУ ЖЫЛҚЫШЫБАЙ , тілші: Оқиғаның бәрі міне дәл осы төңіректе болған. Тұрғындардың айтуынша, ауылдың атышулы бұзақылары үйінен пневматикалық қаруды алып шығып, айналасындағыларға ата бастаған. Салдарынан, бірнеше адамға және көліктердің терезесіне оқ тиіпті. Оны мына қан іздері мен жерде шашылып жатқан әйнектерден байқауға болады. Атыстан кейін полицейлер үш адамды бірдей ұстап әкеткен. Екеуі әкесі мен баласы болса, ал үшіншісі тұрғындардың сөзінше, төбелесті тоқтатпақ болған жігіт. Осыған ашынған Қосөзен халқы бүгін тағы жиналды. Ауылдықтар араша түскен азамат абақтыда емес, бостандықта жүруі тиіс дейді. Ал оқ атқан деп айыпталған отбасының ауылдан біржола кеткенін қалайды. СВЕТЛАНА ДЭНИС, Қосөзен ауылының тұрғыны: Әкімдік, жанайқайымызға құлақ ас. Өтініш, бұл отбасыға 48 сағат беріп, көшіріп жіберіңіздер. Олар кәмелетке толмаған баланы рөлге отырғызып жүр. Сондай-ақ, ауылдың жастарына қоқан-лоқы көрсетеді. Тұрғындарға қару атқан әкесі мен баласы қатаң жазаға тартылсын. Ал менің баламды босатуын талап етемін. Себебі, ол тек араша түсемін деп, өзі оқ жарақатын алды. Көлігіне де оқ тиді. Осы оқиға бойынша қазір полиция тергеу жүргізіп жатыр. АЛМАТЫ ОБЛЫСТЫҚ ПОЛИЦИЯ ДЕПАРТАМЕНТІНІҢ БАСПАСӨЗ ҚЫЗМЕТІ Қазіргі уақытта қылмыстық істер бойынша сотқа дейінгі тергеп-тексеру жүргізілуде. Оқиғаның барлық мән-жайы анықталып, әрбір қатысушының әрекетіне тиісті құқықтық баға беріледі. Қосөзендіктер талаптарын құр сөз күйінде қалдырмақ емес. Енді әкімдікке ұжымдық арыз түсірмек. Өйткені тұрғындар атыс шығарған бұл отбасы көшпейінше, ауылдың берекесі кірмейтініне сенімді. #Информбюро #31арна #БастыЖаңалықтар #Новости #31канал