Елімізде мейрамханада кешкі ас ішу Жапония мен Қытайдан да қымбаттап кетті

Елімізде мейрамханада кешкі ас ішу Жапония мен Қытайдан да қымбат екен. Numbeo агенттігінің есептеуінше, қазір екі адам дәмханада тамақтану үшін кемі 18 мың теңге қажет. Яғни, баға былтырғымен салыстырғанда 8,3 пайызға өскен. Тіпті, фастфудтың құны да шарықтапты. Жалпы қазақстандықтар отбасылық бюджеттің қанша бөлігін кафедегі дәмді асқа жұмсайды? Әріптесім Дамир Нұрмұхамет халықтың өзінен сұрап білген еді. Дәмді тағам, жайлы атмосфера. Қазір мейрамханаға барып кешкі ас ішу әмиянға салмақ түсіретінін тұрғындар жасырмайды. Сондықтан көпшілік сырттан тамақтануды азайтқан. Әсіресе, отбасымен бірге кафеге барғанда бағаның өскені байқап, басыңды шайқайсың деп отыр. ДАМИР НҰРМҰХАМЕТ, тілші: Мен қазір комбо түскі ас алдым. Құрамында кеспе, тауық еті, салат, нан және сусын бар. Бағасы 3390 теңге. Бұл ең төменгі баға. Еліміздің кейбір өңірлерінде тамақтану бір адамға кемінде 3500-4000 теңгеден басталады екен. Бұл тек түскі ас. Ұлттық статистика бюросының мәліметінше, мейрамханадағы баға биыл тағы 8,3 пайызға өскен. Кәсіпкерлер бұл жағдайды азық-түліктің қымбаттауымен түсіндірді. Оған қоса мемлекетке төлейтін салық та салмақ болып тұр дейді. ШЫРАЙЛЫМ ӨМІРБЕКҚЫЗЫ, кәсіпкер: Баға қатты қымбат деп айта алмаймын. Өз сапасына келеді. Азық-түлік балғын күйінде жеткізіледі. Елге қолжетімді етуге тырысамыз. Анализ жасап отырып түскі асқа комбо жасадық. Баға қымбаттап жатса ол әрине азық-түлікке байланысты. Numbeo агенттігі мамандардың зерттеуінше, Қазақстандағы орташа санаттағы мейрамханада екі адамға арналған кешкі ас 18 мың теңгені құрайды. Салыстырмалы түрде айтсақ, бұл көрсеткіш Жапонияда 14 мың, ал Қытайда 10 мың теңге. Тіпті көрші Өзбекстан мен Қырғызстанда да баға едәуір төмен екен. #Информбюро #31арна #БастыЖаңалықтар #Новости #31канал